قىسقى وليمپيادا-2026: حوككەيدەن قازاقستان قۇراماسىنىڭ ىرىكتەۋ ساتىسىنداعى قارسىلاستارى انىقتالدى
استانا. KAZINFORM - شايبالى حوككەيدەن قازاقستان قۇراماسىنىڭ 2026-جىلعى قىسقى وليمپيادا ىرىكتەۋ ساتىسىنداعى قارسىلاستارى بەلگىلى بولدى.
حالىقارالىق حوككەي فەدەراتسياسى وليمپيادالىق ىرىكتەۋ ساتىسىنداعى بارلىق توپتا سىنعا تۇسەتىن قۇرامالار ءتىزىمىن جاريالادى.
قازاقستاندىق حوككەيشىلەر D توبىندا سلوۆاكيا، اۆستريا جانە ۆەنگريامەن 2026-جىلى يتاليادا وتەتىن قىسقى وليمپياداعا بەرىلەتىن جولدامانى ساراپقا سالادى. ويىندار 2024-جىلدىڭ 29- تامىز جانە 1- قىركۇيەگى ارالىعىندا سلوۆاكيا استاناسى براتيسلاۆا قالاسىندا وتكىزىلەدى.
ال E توبىندا لاتۆيا، فرانسيا، سلوۆەنيا جانە ۋكراينا سىنعا تۇسسە، F توبىندا دانيا، نورۆەگيا، ۇلى بريتانيا جانە جاپونيا وينايدى.
شايبالى حوككەيدەن قازاقستان قۇراماسى ەكى مارتە وليمپيادا ويىندارىندا باق سىنادى. 1998-جىلى – 8، 2006-جىلى – 9- ورىنعا تابان تىرەلەدى. قالعان جىلداردا ىرىكتەۋ ساتىسىنان اسا العان جوق.
2026-جىلعى قىسقى وليمپيادا 6-22- اقپان ارالىعىندا يتاليانىڭ ميلان جانە كورتينا-د’امپەتستسو قالالارىندا بولادى.
ەسكە سالساق، بۇدان بۇرىن قازاقستان 2028-جىلعى حوككەيدەن الەم چەمپيوناتىن وتكىزۋگە ءوتىنىم بەردى.
