قىركۇيەكتە Jibek Joly ارناسىنان جاڭا «111 Juz on bir» سەريالى كورسەتىلەدى
استانا. KAZINFORM - جاڭا تەليەۆيزيالىق ماۋسىمدا Jibek Joly تەلەارناسىندا «111 Juz on bir» تەلەحيكاياسىنىڭ پرەمەراسى بولادى.
111 Juz on bir - دەتەكتيۆتىك دراما جانرىنداعى 40 سەريالى فيلم. سيۋجەت ايەلدەردى زورلىق-زومبىلىقتان قورعاۋ بولىمشەسى قىزمەتكەرلەرىنىڭ كۇندەلىكتى ءومىرىن كورسەتەدى.
باستى كەيىپكەر - ينسپەكتور ايجان قامباروۆا سۇيىكتى ادامىنان ايىرىلعاننان كەيىن بار ۋاقىتىن جۇمىسىنا ارنايدى. جۇمىس بارىسىندا كەيىپكەر ءارتۇرلى قيىندىقتارعا تاپ بولادى، وعان ءجيى تۇرمىستىق زورلىق-زومبىلىق قۇرباندارىنا كومەكتەسۋگە جانە قىلمىستىق تەرگەۋگە قاتىسۋعا تۋرا كەلەدى.
ايجاننىڭ بولىمىندە بىرنەشە قىزمەتكەر بار. ولاردىڭ ءارقايسىنىڭ باسىنان ءتۇرلى وقيعالار وتكەن، ءبىراق ولار ءبارىن جەڭگەن جانە ەڭ باستىسى ءوز ميسسيالارىنا ادالدىقتارىن ساقتاپ قالادى.
«111 Juz on bir» تەلەجوباسىندا ەلىمىزدە تۇرمىستىق زورلىق-زومبىلىقتىڭ الدىن الۋ جۇيەسىن جەتىلدىرۋ، مۇنداي جاعدايلارعا جەدەل دەن قويۋ شارالارى، تۇرمىستىق زورلىق-زومبىلىق جاساعاندارعا جازانى قاتايتۋ باعىتىندا اتقارىلىپ جاتقان جۇمىستار كورسەتىلەدى. ال تەلەحيكايانىڭ ەڭ ماڭىزدى حابارى تاقىرىپتا كورسەتىلگەن.
111 - وتباسى، ايەلدەر جانە بالالار قۇقىعى ماسەلەلەرى بويىنشا جان-جاقتى كومەك كورسەتۋ قىزمەتىنىڭ قازىرگى بايلانىس ورتالىعىنىڭ ءنومىرى.
111 - 24/7 جۇمىس ىستەيدى، پ د جانە وڭىرلەردىڭ جەدەل توپتارىمەن بايلانىستا.
بالالارعا قاتىستى زورلىق-زومبىلىق جاھاندىق پروبلەما بولىپ قالا بەرەدى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، الەمدە ءاربىر ءۇشىنشى ايەل ءومىر بويى زورلىق-زومبىلىقتى باستان كەشىرەدى جانە بۇل كوبىنەسە ءوز ۇيىندە بولادى.
2024-جىلعى ساۋىردە قازاقستاندا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ايەلدەردىڭ قۇقىقتارىن جانە بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى.
وسىنداي وزەكتى تاقىرىپتا تەلەحيكايا جاساۋ - تۇرمىستىق زورلىق-زومبىلىق ماسەلەسىنە قوعامنىڭ نازارىن اۋدارۋ جانە وعان دەگەن كوزقاراستى وزگەرتۋ جولىنداعى ماڭىزدى قادام. اۆتورلاردىڭ ايتۋىنشا، فيلم ايەلدەردى وزدەرىن قۇرمەتتەۋگە، كومەك پەن قۇقىق قورعاۋ ورگاندارىنا جۇگىنۋدەن ۇيالماۋعا شاقىرادى.
سەريال جۇمىسىنا بىلىكتى رەجيسسەرلىك توپ تارتىلعان: بەيبىت ونەر، بەرىك جاحانوۆ، موديار ابدۋقادىروۆ جانە ەۆگەني پالامارچۋك.
اكتەرلەر قۇرامى دا جاقسى تاڭدالعان. سەريالدان اتاقتى اكتەرلەردى دە، دەبيۋتانتتاردى دا كەزدەستىرۋگە بولادى.
باستى رولدەردى جانەل سەرعازينا مەن ەركەبۇلان دايىروۆ سومدايدى. جوباعا سونىمەن قاتار اسان ءماجيت، ەرمەك شىنبولاتوۆ، جارقىناي حانايىم، اينۇر بولات جانە ت. ب. قاتىسادى. پروديۋسەرى انار ءجۇنىسوۆا مەن اننا چاكيرتوۆا.
تەلەكورەرمەندەر «111 Juz on bir» دراماسىنىڭ ءبىرىنشى ءبولىمىن 16 قىركۇيەكتە Jibek Joly تەلەارناسىنان تاماشالاي الادى.
سەريال جۇمىس كۇندەرى ساعات 22:00 دە كورسەتىلەدى.
2021-جىلى ەل پرەزيدەنتى پوليتسيا بولىمدەرىندە ايەل تەرگەۋشىلەردەن جەدەل توپتار قۇرۋدى تاپسىردى. ال 2023-جىلى قاراعاندىدا العاشقى ايەلدەر پوليتسياسى بولىمشەسى اشىلدى. ونىڭ قۇرامىندا پسيحولوگتار، زاڭگەرلەر، سوت ورىنداۋشىلارى، يۋۆەنالدىق پوليتسيا، تەولوگتار، ۆولونتەرلار، مەدياتورلار، الەۋمەتتىك قىزمەتكەرلەر جانە ت. ب. بار.
ال 2024-جىلى ىشكى ىستەر مينيسترلىگى قۇرىلىمىندا جاڭا قىزمەت - ايەلدەردى زورلىق-زومبىلىقتان قورعاۋ بولىمشەسىنىڭ پايدا بولعانىنا 25 جىل بولدى.
ول ايەلدەردىڭ كونستيتۋتسيالىق قۇقىقتارىن، بوستاندىقتارى مەن مۇددەلەرىن زاڭسىز شابۋىلداردان قورعاۋ، ولارعا زورلىق-زومبىلىق ارەكەتتەرىنىڭ الدىن الۋ جانە جولىن كەسۋدە قۇقىقتىق كومەك كورسەتۋ ماقساتىندا قۇرىلعان.
ءبولىم پوليتسيا مەن ۇكىمەتتىك ەمەس سەكتورلاردى، سونداي-اق مەملەكەتتىك ورگانداردى بايلانىستىرادى.
