قىرعىزستانداعى قازاق دياسپوراسى تاسقىننان جاپا شەككەن قازاقستاندىقتارعا گۋمانيتارلىق كومەك جيناپ جاتىر

بىشكەك. KAZINFORM - قازاق دياسپوراسى قىرعىزستان حالقى اسسامبلەياسىمەن بىرلەسىپ قازاقستاندا سۋ تاسقىنىنان زارداپ شەككەندەرگە گۋمانيتارلىق كومەك جيناپ جاتىر.

قىرعىزستان حالقى اسسامبلەياسى كەڭەسىنىڭ ءتوراعاسى المامبەت ماتۋبرايموۆ اتاپ وتكەندەي، قازاقستان ءۇشىن وسىنداي قيىن- قىستاۋ كەزەڭدە ءوزى باسقاراتىن قوعامدىق ۇيىم شەتتە قالا المادى، ونىڭ بارلىق مۇشەلەرى باۋىرلاس حالىققا كوڭىل ءبولىپ، قولدان كەلگەنشە قولداۋ كورسەتۋگە نيەت ءبىلدىردى.

«قىرعىزستان حالقى اسسامبلەياسى قاتتى سۋ تاسقىنىنان زارداپ شەككەن كورشى قازاقستانعا گۋمانيتارلىق كومەك كورسەتۋ تۋرالى باستاما كوتەردى. تاسقىن سالدارىنان ايماقتاردى سۋ باستى. حالىق قولداۋعا مۇقتاج. ءبىز ازىق-تۇلىك، كيىم-كەشەك، توسەك-ورىن، كورپە، ماتراس جانە ت. ب. تۇرىندە گۋمانيتارلىق كومەك جيناۋدامىز. بۇل - دوستىق ارەكەت. قىرعىزستان دا قازاقستان سياقتى كوپ ۇلتتى مەملەكەت. قىرعىز رەسپۋبليكاسى حالقى اسسامبلەياسىندا 37 ۇلتتىڭ وكىلى رەسمي تىركەلگەن. ەتنيكالىق قوعامدىق بىرلەستىكتەردىڭ مۇشەلەرى تابيعي اپاتتارعا بايلانىستى وسىنداي كەلەڭسىز جاعداي كەزىندە باۋىرلاس قازاقستان حالقىنا كوڭىل ءبولىپ، قولداۋ كورسەتكىسى كەلەدى»، - دەدى ول.

قىرعىزستان قازاقتارى قاۋىمداستىعىنىڭ ءتورايىمى حامار بولوتوۆا قىرعىزستان حالقى اسسامبلەياسىنىڭ وكىلدەرى اتىنان قازاقستانعا سۋ تاسقىنىنا بايلانىستى قيىن جاعدايعا ورتاق بولۋ سوزدەرىن جەتكىزدى.

«قىرعىزستاندا تۇراتىن قازاقتار قىرعىز رەسپۋبليكاسى حالقى اسسامبلەياسىمەن بىرلەسىپ سۋ تاسقىنىنان زارداپ شەككەن قازاقستاندىقتارعا گۋمانيتارلىق كومەك جيناپ جاتىر. قوعامدىق بىرلەستىك مۇشەلەرى كورشى ەلگە قولداۋ كورسەتۋ تۋرالى شەشىمدى ءبىراۋىزدان قابىلدادى. ءبىر شەتتە قالماي، بارلىعى كومەكتەسىپ جاتىر. قازاق دياسپوراسى ءوز حالقىنا شىنايى جاناشىرلىق تانىتىپ وتىر. قولىمىزدان كەلگەنشە كومەكتەسەمىز»، - دەپ قوستى ول.

بۇعان دەيىن حابارلانعانداي، 6-ساۋىردە قىرعىزستاننىڭ توتەنشە جاعدايلار مينيسترلىگىنىڭ قۇتقارۋشىلارى سۋ تاسقىنىنان زارداپ شەككەن قازاقستان حالقىنا 300 توننا گۋمانيتارلىق جۇك جىبەردى.

14-ساۋىردە قىرعىزستاندا وندىرىلگەن 150 توننا ءسۇت ونىمدەرىنەن تۇراتىن گۋمانيتارلىق كومەكتىڭ ەكىنشى پارتياسى جونەلتىلدى.

18-ساۋىردە قىرعىز رەسپۋبليكاسىنىڭ ىشكى ىستەر مينيسترلىگى قازاقستاندىق ارىپتەستەرىنە اۋقىمدى سۋ تاسقىنىنىڭ سالدارىمەن كۇرەسۋ ءۇشىن 50 توننادان استام گۋمانيتارلىق كومەك جىبەردى.

اۆتور
زارينا تۋعانبايەۆا