قىرعىزستاندا قازاقستاندىق كاسىپكەر ەرقانات جۇمابەكوۆكە ىزدەۋ جاريالاندى
بىشكەك. KAZINFORM - قىرعىزستاننىڭ ۇلتتىق قاۋىپسىزدىك مەملەكەتتىك كوميتەتى قازاقستاندىق كاسىپكەر ەرقانات جۇمابەكوۆكە ق. اسانبەكتىڭ (قامشى كولبايەۆ) ۇيىمداسقان قىلمىستىق توبىن قارجىلاندىرعانى ءۇشىن ىزدەۋ جاريالادى، دەپ حابارلايدى Kazinform ءتىلشىسى.
ۇ ق م ك مالىمەتىنشە، قىلمىستىق جولمەن الىنعان كىرىستەردى زاڭداستىرۋ (جىلىستاتۋ) فاكتىسى بويىنشا تىركەلگەن سوتقا دەيىنگى تەرگەۋ ماتەريالدارى اياسىندا جۇرگىزىلگەن ىزدەستىرۋ- تەرگەۋ شارالارى بارىسىندا حالىقارالىق «اعايىندىلار شەڭبەرى» قىلمىستىق توبىنا كىرگەن، «زاڭداعى ۇرى» كامچى اسانبەك (كولبايەۆ) باسقارعان ۇيىمداسقان قىلمىستىق توپتىڭ قىزمەتىن قارجىلاندىرۋ فاكتىلەرى انىقتالدى. بۇل ارەكەتتەرگە قازاقستان رەسپۋبليكاسىنىڭ ءىرى كاسىپكەرلەرىنىڭ ءبىرى - جۇمابەكوۆ ەرقانات بەرىكباي ۇلى قاتىسى بار دەپ ايىپتالىپ جاتىر.
- اتالعان تۇلعا ق. اسانبەكتىڭ قىلمىستىق قوعامداستىق قۇرامىندا كاسىپكەرلەردەن قولداۋ الۋ، ونىڭ ىسكەرلىك مۇددەلەرىن قولداۋ جانە تمد ەلدەرى اۋماعىندا ەكونوميكالىق جوبالاردى ىلگەرىلەتۋ ماقساتىندا رەكەت، بوپسالاۋ، الىم-سالىق تۇرىندەگى زاڭسىز ارەكەتتەردەن جۇيەلى تۇردە قاراجات العان قىلمىستىق ارەكەتى تۋرالى بىلە تۇرا «زاڭداعى ۇرى» ق. اسانبەكپەن تىعىز بايلانىستا بولعان، - دەلىنگەن حابارلامادا.
ە. جۇمابەكوۆتىڭ قىلمىستىق الەم جەتەكشىسىمەن دوستىق قارىم-قاتىناستا بولعانى، سونىمەن قاتار ق. اسانبەكپەن ىستىقكول وبلىسىندا ورنالاسقان «بارس» دەمالىس بازاسىنىڭ اۋماعىندا بىرنەشە رەت كەزدەسىپ، دەمالعانى، سونداي-اق ق. اسانبەكتىڭ الماتى اۋماعىنا بارعان كەزدە ونىڭ جاقىن تۋىستارىنا بارلىق ماتەريالدىق كومەك كورسەتكەنى اتاپ ءوتىلدى.
ە. جۇمابەكوۆكە قاتىستى بىشكەك قالاسى وكتيابر اۋداندىق سوتىنىڭ قاۋلىسىمەن سىرتتاي قاماۋعا الۋ تۇرىندەگى بۇلتارتپاۋ شاراسى تاڭدالدى. اتالعان ازاماتقا ىزدەۋ جاريالاندى.
ەسكە سالايىق، 2024 -جىلدىڭ ماۋسىمىندا قىرعىز رەسپۋبليكاسىنىڭ ۇقمك «Vertex Gold» كومپانياسىنىڭ قوجايىنى ۆلاديمير دجۋمانبايەۆقا دا ق. اسانبەكتىڭ ۇيىمداسقان قىلمىستىق توبىن قارجىلاندىرعانى ءۇشىن ىزدەۋ جاريالاعان بولاتىن. كەيىن قازاقستاندىق كاسىپكەرگە قاتىستى سوتقا دەيىنگى ءوندىرىس ونىڭ ۇيىمداسقان قىلمىستىق توپتىڭ قىزمەتىنە قاتىسى جانە قارجىلاندىرۋىنىڭ بولماۋىنا بايلانىستى توقتاتىلدى.
