قىرعىزستاندا ەكى مارتە كەڭەس وداعىنىڭ باتىرى تالعات بيگەلدينوۆتى ەسكە الدى
استانا. KAZINFORM - بىشكەكتەگى جاس گۆارديا بۋلۆارىندا جەڭىستىڭ 80 جىلدىعىنا وراي 1945-جىلعى جەڭىس پارادىنا قاتىسقان، ەكى مارتە كەڭەس وداعىنىڭ باتىرى تالعات بيگەلدينوۆتىڭ مۇسىنىنە گۇل شوقتارىن قويۋ ءراسىمى ءوتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
اڭىزعا اينالعان قازاقستاندىق ۇشقىشتى جانە ۇلى وتان سوعىسىندا قازا تاپقان بارلىق جاۋىنگەرلەردى ەسكە الۋعا قىرعىز رەسپۋبليكاسىنداعى قازاقتار قاۋىمداستىعىنىڭ مۇشەلەرى، قازاقستاننىڭ قىرعىزستانداعى ەلشىلىگىنىڭ قىزمەتكەرلەرى مەن ولاردىڭ وتباسىلارى قاتىستى.
ءىس-شاراعا قاتىسۋشىلار ەسكە الۋ ءراسىمىنىڭ ماڭىزىن ەرەكشە اتاپ ءوتتى. گۇل شوقتارىن قويۋ - وتان ءۇشىن جانىن قيعان جاۋىنگەرلەرگە دەگەن قۇرمەت پەن تاعزىم بەلگىسى.
ايتا كەتەيىك، تالعات بيگەلدينوۆتى قىرعىزستانمەن بالالىق شاعى مەن جاستىق كەزى بايلانىستىرادى. ول بىشكەكتە 16 جاسىندا اەروكلۋبقا قابىلدانعان. 1940-جىلى قىزىل ارميا قاتارىنا شاقىرىلىپ، بالاشوۆ اسكەري ۇشقىشتار مەكتەبىنە تۇسكەن. كەيىن چكالوۆ اسكەري اۆياتسيا ۋچيليشەسىنە اۋىسىپ، ونى 1942-جىلى اياقتادى.
اعا لەيتەنانت تالعات بيگەلدينوۆكە 1944-جىلدىڭ قازانىندا مايدان مەن تىلداعى ەرلىگى، جاۋ ۇشاعىن جەكە ءوزى اتىپ ءتۇسىرۋى جانە جاۋىنگەرلىك شەبەرلىگى ءۇشىن كەڭەس وداعىنىڭ باتىرى اتاعى بەرىلدى. ال 1945-جىلدىڭ 27-ماۋسىمىندا كراكوۆ، وپپەلن، كاتوۆيتسە، برەسلاۋ جانە بەرلين قالالارى ءۇشىن شايقاستاردا قارسىلاس اسكەرلەرى مەن تەحنيكاسىن شابۋىلداۋداعى ەرلىگى مەن ەسكادريليانى شەبەر باسقارعانى ءۇشىن ول ەكىنشى رەت كەڭەس وداعىنىڭ باتىرى اتاندى.
بۇعان دەيىن بەلگيادا دا قازاقستاندىق مايدانگەرلەردى ەسكە الۋ ءراسىمى وتكەن بولاتىن.
سونداي-اق، ۆاشينگتوندا ەلبا وزەنىندەگى كەڭەس جانە امەريكالىق اسكەرلەردىڭ كەزدەسۋىنە وراي گۇل شوقتارى قويىلدى.
