قىرعىزستان ساراپشىلارى اپيىن كوكنارىن ءوسىرۋدى قولدادى

 قىرعىزستاندا اپيىن كوكنارىن ءوندىرۋ جوباسىن جۇزەگە اسىرۋدى قولدايتىن باستاماشىل توپ قۇرىلدى. 

Қирғизистон
Фото: Фото: pixabay.com

ساراپشىلار پىكىرىنشە، شيكىزاتتى ءوسىرۋدىڭ قاۋىپسىزدىگى مەن مەحانيكالاندىرىلۋىن قامتاماسىز ەتە الاتىن مەملەكەتتىك مەكەمە قۇرۋ قاجەت. قازاقپارات بۇل تۋرالى 24.kg باسىلىمىنا سىلتەمە جاساپ حابارلايدى.

رەسەي جاراتىلىستانۋ عىلىمدارى اكادەمياسىنىڭ اكادەميگى مۇرات سۇيىنبايەۆتىڭ اتاپ وتۋىنشە، رەسەي - قىرعىزستاندا وسىرىلگەن اپيىن كوكنارىن ساتۋ ءۇشىن ەڭ ءتيىمدى نارىق. قۇندى شيكىزاتقا ماجارستاندا دا سۇرانىس جوعارى. ەكى الەۋەتتى سەرىكتەس تە كوكنار نەگىزىندە مەديتسينا پرەپاراتتارىن ءوندىرۋ بويىنشا قۋاتتى ەلدەر. ونىمەن ءبىر مەزگىلدە، ساراپشىنىڭ پىكىرىنشە، «كوكنار جوباسىنا» تۇركيا، يران مەن ءۇندىستان قولداۋ بىلدىرە الار ەدى.

مۇرات سۇيىنبايەۆ ەسىرتكى زاتتارى تۋرالى 1961 -جىلعى كونۆەنسيا اياسىندا 5 توننادان ارتىق اپيىن كوكنارى ب ۇ ۇ بەرەتىن كۆوتا ارقىلى وندىرىلەتىنىن ايتتى.

«قىرعىزستاننىڭ وسىنداي كۆوتا الۋ مۇمكىندىگى جوعارى. سەبەبى ەكونوميكامىز دامۋشى، ال ەلدە تەڭىزگە شىعار جول جوق»، - دەيدى ول.

بيوحيميك دارىگەر باقىت سايىپبايەۆ انالگەتيك- دارىلەردىڭ 50 دەن استام اتاۋىن وندىرۋگە اپيىن كوكنارى پايدالانىلاتىنىن ەسكە سالدى. وعان قوسا نەگىزگى الەۋەتتى سەرىكتەس - رەسەيدىڭ سوعىس پەن حالىقارالىق وقشاۋلاۋ سالدارىنان بۇل شيكىزاتقا سۇرانىسى ءتىپتى ارتىپ وتىر.

ساراپشىنىڭ پىكىرىنشە، ەلدەگى ەسىرتكى جاعدايى ناشارلاپ كەتە مە دەگەن قاۋىپتىڭ نەگىزى جوق. سەبەبى قىرعىزستاندا ەسىرتكى تاسىمالى بار ەكەنى جاسىرىن ەمەس، ونى توقتاتۋ ءۇشىن مەملەكەت تاراپىنان باقىلاۋ كەرەك.

ساياساتكەر باقىت بەكەتايەۆ قىرعىزستان اۋىل شارۋاشىلىعىن دامىتىپ، مارجينال ونىممەن اينالىسقانى دۇرىس دەپ ەسەپتەيدى. اپيىن كوكنارى - ەڭ تابىستى سالا. ساراپشى كوكنار ءوسىرۋ ءۇشىن 1 مىڭ گەكتار جەر بولىنسە، جىلىنا 2,5 ميلليارد دوللار تابىس ءتۇسىپ وتىراتىنىن اتاپ ءوتتى.

سوڭعى جاڭالىقتار