قىرعىزستان مەن وزبەكستان شەكاراسىندا جاسىرىن تۋننەل تابىلدى
استانا. KAZINFORM - قىرعىزستاننىڭ جالالاباد وبلىسىندا وزبەكستانعا اپاراتىن تاعى ءبىر تۋننەل تابىلدى. قىرعىزستاندا تۇراتىن كۇدىكتى سول ارقىلى ادامدار مەن تاۋارلاردى زاڭسىز وتكىزىپ جۇرگەن.
شەكارانى زاڭسىز كەسىپ ءوتتى دەگەن كۇدىكپەن 40 جاستاعى وزبەكستان ازاماتى قاماۋعا الىندى، دەپ حابارلايدى kazinform قىرعىزستان ىشكى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ.
بۇل تۋننەل ارقىلى وزبەكستان اۋماعىنا ادامدار مەن كونتراباندالىق تاۋارلار زاڭسىز تاسىمالدانعانى اتاپ وتىلگەن. وسى جىلدىڭ 5-ساۋىرىندە وبلىستىق ءى ءى ب قىزمەتكەرلەرى قىرعىزستان شەكاراسىن زاڭسىز كەسىپ وتكەن وزبەكستان ازاماتىن قولعا تۇسىرگەن. ونىڭ كورشى ەلگە وسى قۇپيا تۋننەل ارقىلى وتكەنى انىقتالعان.
سونداي-اق، 12-ساۋىرگە قاراعان ءتۇنى نووكەن اۋدانىندا اقشاعا قىرعىز-وزبەك شەكاراسىن زاڭسىز كەسىپ ءوتۋدى ۇيىمداستىردى دەگەن كۇدىكپەن جەرگىلىكتى حالىقتىڭ وكىلى دە قاماۋعا الىندى.
«كۇدىكتىدەن ارنايى تاڭبالانعان ۆاليۋتا مەن تۇندە كورەتىن ءدۇربى تاركىلەندى. سونداي-اق ونىڭ ۇيىندە قۇنى 30 مىڭ دوللارعا جۋىق 87 قوراپ ەسىرتكى ساقتاعانى انىقتالدى»، - دەلىنگەن حابارلامادا.
