قىرعىزستان مەملەكەتتىك اۋرۋحانا باسشىلارىنا جەكەمەنشىك ەمحانالاردا جۇمىس ىستەۋگە تىيىم سالماق

استانا. KAZINFORM - قىرعىزستاندا مەملەكەتتىك ەمدەۋ مەكەمەلەرىنىڭ باسشىلارىنا جەكەمەنشىك ەمحانالاردا ءبىر ۋاقىتتا قىزمەت اتقارۋعا تىيىم سالۋ ۇسىنىسى جاسالدى.

قىرعىز رەسپۋبليكاسى جوگوركۋ كەنەشىنىڭ الەۋمەتتىك ساياسات جونىندەگى كوميتەتى «ازاماتتاردىڭ دەنساۋلىعىن قورعاۋ تۋرالى» زاڭعا تۇزەتۋلەردى ءبىرىنشى وقىلىمدا ماقۇلدادى.

دەپۋتات ايسۇلۋ ماماشوۆانىڭ ايتۋىنشا، زاڭ جوباسى قىرعىزستان ازاماتتارىنا سەنىمدى جانە ساپالى مەديتسينالىق كومەك كورسەتۋ ءۇشىن ازىرلەنگەن.

«مەملەكەتتىك مەديتسينالىق مەكەمە باسشىلارىن جەكەمەنشىك ەمحانالاردا ءبىر مەزگىلدە جۇمىسقا ورنالاستىرۋعا تىيىم سالۋ ۇسىنىلىپ وتىر. مەملەكەتتىك مەديتسينالىق مەكەمەلەردە باسشىلىق قىزمەتتەردى اتقارۋدى جانە جەكەمەنشىك ەمحانالاردا جۇمىس ىستەۋدى شەكتەۋ سىبايلاس جەمقورلىق سحەمالارىنىڭ ىقتيمالدىعىن ازايتۋعا، مەديتسينالىق قىزمەت كورسەتۋ ساپاسىن جاقسارتۋعا جانە حالىقتىڭ دەنساۋلىق ساقتاۋ جۇيەسىنە سەنىمىن ارتتىرۋعا باعىتتالعان»، - دەپ اتاپ ءوتتى حالىق دەپۋتاتى.

قۇجاتتى تالقىلاۋ بارىسىندا تەك باسشىلارعا عانا ەمەس، مەديتسينالىق مەكەمەلەردىڭ ءبولىم باسشىلارىنا دا جەكەمەنشىك ەمحانالاردا جۇمىس ىستەۋگە تىيىم سالۋ تۋرالى ۇسىنىس ايتىلدى. سونداي-اق، مەملەكەتتىك مەديتسينالىق مەكەمە باسشىلارىنىڭ جالاقىسىن كوتەرۋ جانە ولاردىڭ قىزمەتتە بولۋ مەرزىمىن 10 جىلدان 5 جىلعا دەيىن قىسقارتۋ ماسەلەسى كوتەرىلدى.

بۇعان دەيىن قىرعىزستان پارلامەنتى ەندى زاڭ قابىلداۋعا اسىقپايتىنى تۋرالى حابارلانعان بولاتىن.

وسىعان دەيىن قىرعىزستاندا ازىق-تۇلىك قاۋىپسىزدىگى جانە تاماقتانۋ عىلىمي-زەرتتەۋ ينستيتۋتى پايدا بولاتىنى تۋرالى جازدىق.