قىرعىزستان ازاماتتارىنا رەسەيگە كىرۋ كەزىندە كۇشەيتىلگەن باقىلاۋعا دايىندالۋدى ۇسىندى
بىشكەك. KAZINFORM - قىرعىز رەسپۋبليكاسىنىڭ سىرتقى ىستەر مينيسترلىگى ساپارىن جوسپارلاپ وتىرعان ازاماتتارعا رەسەي فەدەراتسياسىنا كەلۋ ەرەجەلەرى بويىنشا ۇسىنىستار بەردى، دەپ حابارلايدى Kazinform مەنشىكتى ءتىلشىسى.
قىرعىزستاندىقتارعا مىنالار قاجەت ەكەندىگى ەسكەرتىلدى:
* ر ف مەملەكەتتىك شەكاراسىن كەسىپ ءوتۋ قۇقىعىن بەرەتىن جەكە باسىن كۋالاندىراتىن قۇجاتتاردى الدىن الا دايىنداۋ.
* رەسەيگە كىرۋدىڭ زاڭدىلىعىن انىقتاۋعا بايلانىستى جانە بەلگىلى ءبىر ۋاقىتتى تالاپ ەتەتىن قوسىمشا تەكسەرۋ شارالارىنا دايىن بولۋ.
* تەكسەرۋ جۇرگىزۋ كەزىندە سابىرلىق تانىتىپ، رەسەيلىك شەكارا جانە باسقا دا قۇزىرلى ورگانداردىڭ تالاپتارىن ورىنداۋ.
شەكارا ورگاندارى تەكسەرگەننەن كەيىن رەسەي فەدەراتسياسىنا كىرۋدەن باس تارتۋ تۋرالى شەشىم قابىلدانۋى مۇمكىن. بۇل جاعدايدا ازاماتقا مۇنداي شەشىمنىڭ نەگىزىن كورسەتەتىن ءتيىستى قۇجات بەرىلەدى. حالىقارالىق شارتتارعا سايكەس، رەسەي فەدەراتسياسىنا كىرۋگە تىيىم سالىنعان تۇلعالار اۋە كومپانيانىڭ جاۋاپكەرشىلىگىنە تاپسىرىلىپ، كەلەسى رەيسپەن كەلگەن ەلگە ورتاشا ەسەپپەن 1-3 كۇن ىشىندە قايتارىلادى. وسى كەزەڭدە اۋە كومپانياسى ولاردى سۋمەن، تاماقپەن قامتاماسىز ەتەدى.
ادەتتەن تىس جاعدايلاردا قىرعىزستان ازاماتتارى ر ف سىرتقى ىستەر مينيسترلىگىنىڭ كونسۋلدىق مەكەمەلەرىنە جانە قىرعىز رەسپۋبليكاسىنىڭ رەسەي فەدەراتسياسىنداعى وكىلدىگىنە جۇگىنە الادى. قاجەت بولسا، اۋدارماشى شاقىرتا الادى. رەسەي فەدەراتسياسىنا كىرۋگە تىيىم سالۋدى رەسەيدىڭ ءى ءى م جانە باسقا ۋاكىلەتتى ورگاندارى بەلگىلەي الادى.
اتاپ وتىلگەندەي، رەسەي فەدەراتسياسىنىڭ مەملەكەتتىك شەكاراسى ارقىلى وتكىزۋ پۋنكتتەرىندە ەنگىزىلگەن كۇشەيتىلگەن باقىلاۋ رەجيمى بارلىق شەتەلدىك ازاماتتارعا قاتىستى جانە «كروكۋس سيتي حولدا» بولعان لاڭكەستىك ارەكەتىنەن كەيىن ەلدە قاۋىپسىزدىك پەن تەرروريمگە قارسى قورعانىستى قامتاماسىز ەتۋگە باعىتتالعان.
