قىرعىز پرەزيدەنتى: بيلىكتى كۇشتەپ اۋىستىرۋعا نەگىز جوق

садыр жапаров
Фото: Кабар

استانا. KAZINFORM - قىرعىزستان پرەزيدەنتى سادىر جاپاروۆ كابار ۇلتتىق اقپارات اگەنتتىگىنە بەرگەن سۇحباتىندا ەلدەگى بيلىكتى اۋىستىرۋعا ەش نەگىز جوق ەكەنىن ايتتى.

«بۇگىنگى كۇنى بيلىكتى وزگەرتۋگە نەگىز جوق. ءبىز بۇعان قانداي دا ءبىر سەبەپتەردىڭ پايدا بولۋىنا جول بەرمەيمىز. تلەكمات كۇرەڭوۆ (قىرعىز بەلسەندىسى - رەد.) ولاردىڭ كوپ ەكەنىن ايتىپ ءجۇر. ءبىز ءبارىن بەس ساۋساعىمىزداي جاقسى بىلەمىز. جوعارىدا ايتقانىمداي، ولاردىڭ ارتىندا تۇتاس توپتار تۇر. ونى وزدەرى دە جاسىرماي ايتىپ ءجۇر. بۇرىن نەلىكتەن بيلىك وزگەردى؟ بيلىكتىڭ ءوزى ۇرىلار مەن كريمينالعا جاقىن بولدى. ەلدى كلاندار، جەرلەستەر مەن تۋىستار باسقارعانىن، ولاردىڭ ەكونوميكانى توناپ، سازعا باتىرعانىن، ءادىل ەمەس سايلاۋ وتكىزگەنىن كورگەن حالىقتىڭ شىدامى تاۋسىلدى. ريەۆوليۋتسيانىڭ سەبەبى وسى بولدى»، - دەدى سادىر جاپاروۆ.

قىرعىز پرەزيدەنتى بۇعان جول بەرمەيتىنىن، ادال جانە اشىق سايلاۋ وتكىزۋگە ەرىك-جىگەرى جەتەتىنىن ايتتى.

«باسقا مەملەكەتتەر بيۋللەتەندى ءالى دە قولمەن سانايدى، ءبىز بۇدان الدەقاشان كەتىپ قالدىق. سايلاۋشىلاردى كوبەيتۋ ءۇشىن بيۋللەتەندى بىرىنەن ەكىنشىسىنە لاقتىرۋ ەندى مۇمكىن ەمەس. اۆتوماتتاندىرىلعان ۋرنالار بىردەن ناتيجەسىن كورسەتەدى. وسىدان كەيىن عانا باقىلاۋشىلاردىڭ قاتىسۋىمەن قولمەن ساناۋ جۇرگىزىلەدى»، - دەدى ول.

سونداي-اق، س. جاپاروۆ جاقىن تۋىستارىن مەملەكەتتىك باسقارۋ جۇيەسىنە تارتپاعانىن، ەكونوميكالىق كورسەتكىشتەر ءوسىپ كەلە جاتقانىن اتاپ ءوتتى.

«بۇقارا حالىقتى تارتىپ، تارتىپسىزدىك ۇيىمداستىرۋدى ماقسات ەتكەندەرگە جاۋاپ قاتال بولادى. ءبىز الدىن الۋ ءۇشىن جۇمىس ىستەيمىز جانە حالىقتى جيناپ، ولاردى جاسىرىن اتۋعا نەمەسە جارىلىس ۇيىمداستىرۋعا دايىن شابۋىلداۋشىلاردى انىقتايمىز. ولار ءۇشىن ەڭ قاتاڭ جازا بولادى. بىزگە دەيىنگىلەر سەكىلدى ولارمەن بالاشا سويلەسىپ وتىرمايمىز. ءبىز ءۇشىن مەملەكەت پەن قاراپايىم حالىقتىڭ قاۋىپسىزدىگى ءبىرىنشى ورىندا تۇر. ال بيلىككە كەلگىسى كەلەتىندەرگە ايتارىم، مۇنى زاڭدى تۇردە، سايلاۋعا قاتىسۋ ارقىلى جاساعانىڭىز ءجون»، - دەدى سادىر جاپاروۆ.

سوڭعى جاڭالىقتار