قىرعىز پارلامەنتىنىڭ دەپۋتاتتارى ساعات بەلدەۋىن وزگەرتۋدى ۇسىندى
جوگوركۋ كەنەش وتىرىسىندا پارلامەنتاريلەر قىرعىزستاندا ساعات بەلدەۋىن وزگەرتۋ ماسەلەسىن كوتەردى، دەپ حابارلايدى Kazinform.
دەپۋتات ميرگۇل تەمىربايەۆا «باتكەن تاڭى» گازەتىنىڭ باس رەداكتورى ادىلبەك اكماتوۆ پەن باتكەندىك دارىگەر نۇرالى قويلىبايەۆتىڭ ساعات ءتىلىن 1 ساعاتقا كەيىنگە اۋىستىرۋ تۋرالى باستاماسىنا نازار اۋدارتتى. سونىمەن قاتار ول الەۋمەتتىك جەلىدە كوپتەگەن ازاماتتىڭ بۇل ۇسىنىسقا قولداۋ ءبىلدىرىپ جاتقانىن اتاپ ءوتتى.
ونىڭ پايىمىنشا، بۇل باستاما ەڭ الدىمەن ەل ازاماتتارىنىڭ پسيحولوگيالىق دەنساۋلىعىن ساقتاۋعا باعىتتالعان.
دەپۋتاتتىڭ پايىمىنشا، وسى شەشىم ارقىلى وقۋ ورنىنا جانە بالاباقشاعا بارۋ ءۇشىن ەرتە تۇراتىن بالالار مەن ستۋدەنتتەردىڭ دەنساۋلىعىنا تەرىس اسەردەن ارىلۋعا بولادى. سونداي-اق ۇسىنىلىپ وتىرعان شارا ەلەكتر ەنەرگياسىن ۇنەمدەپ، سول ارقىلى ەكونوميكاعا دا ۇلەس قوسادى.
وسىعان وراي ميرگۇل تەمىربايەۆا جوگوركۋ كەنەش ءتوراعاسىنان مينيسترلەر كابينەتىنە قىرعىزستاندا ساعات ءتىلىن 1 ساعاتقا كەيىنگى اۋىستىرۋ ماسەلەسىن قاراۋ بويىنشا حاتتامالىق تاپسىرما بەرۋدى ءوتىندى.
دەپۋتات سۇيىنبەك ءومىرزاقوۆ تا بۇل شەشىمدى قولداپ، مەملەكەتتىك ورگاندارعا عالىمدارمەن بىرگە ەلدەگى ساعات بەلدەۋىن وزگەرتۋ ماسەلەسىن قاراستىرۋدى جانە شەشىم قابىلداۋدى ۇسىندى.
اۆتور
مارلان جيەمباي
