قۇپيا قىزمەت اگەنتى ترامپتىڭ ساپارىندا جۇبايىن جاسىرىن ۇشاققا وتىرعىزباق بولدى
ۆاشينگتون. KAZINFORM - ا ق ش-تىڭ قۇپيا قىزمەتى ءوز قىزمەتكەرلەرىنىڭ بىرىنە قاتىستى تەرگەۋ جۇرگىزىپ جاتىر. ول ا ق ش پرەزيدەنتى دونالد ترامپتىڭ شوتلاندياعا ساپارى كەزىندە جۇبايىن قىزمەتتىك ۇشاققا وتىرعىزۋعا تىرىسقان. بۇل تۋرالى بريتاندىق The Daily Mail گازەتى حابارلادى، دەپ جازادى ت ا س س.
باسىلىمنىڭ مالىمەتىنشە، اگەنتتىڭ ايەلى ۆاشينگتون ماڭىنداعى ەندريۋس اسكەري بازاسىنداعى جوعارى لاۋازىمدى تۇلعالارعا ارنالعان زالدا بايقالعان. بۇل - ادەتتە پرەزيدەنتتىڭ ارنايى بورتى ۇشاتىن بازا. سونىمەن قاتار، ايەل قۇپيا قىزمەتتىڭ الداعى ساپارعا ارنالعان ارنايى بريفينگىنە قاتىسقانى انىقتالعان.
ءوز كەزەگىندە The Herald گازەتى اگەنتتىڭ جۇبايىن قۇپيا قىزمەت قىزمەتكەرلەرى مەن قۇرال-جابدىقتاردى تاسىمالداۋعا ارنالعان ۇشاققا وتىرعىزۋعا تىرىسقانىن جازدى. باسىلىم ايەلدىڭ اقش اۋە كۇشتەرىندە قىزمەت ەتەتىنىن دە اتاپ وتكەن. الايدا، ۇشار ءساتتىڭ الدىندا ونى ۇشاققا كىرگىزبەي قويعان.
ا ق ش پرەزيدەنتىنىڭ شوتلاندياعا ساپارى 25-29-شىلدە ارالىعىندا ءوتتى. سەيسەنبى كۇنى، ابەرديننەن ۆاشينگتونعا ۇشىپ بارا جاتقاندا، جۋرناليستەر ترامپتان اتالعان وقيعاعا قاتىستى پىكىر سۇرادى.
- قىزىق جاعداي ەكەن. …بۇل ءسال قاۋىپتى ەمەس پە؟… مەن بۇل تۋرالى ەكى مينۋت بۇرىن عانا ەستىدىم. مەنىڭشە، قۇپيا قىزمەتتىڭ جەتەكشىسى شون (كارران) بۇل ماسەلەمەن اينالىسادى، - دەدى ا ق ش پرەزيدەنتى.
ايتا كەتەيىك، بۇعان دەيىن ا ق ش پرەزيدەنتى دونالد ترامپ يراننىڭ يادرولىق نىساندارى قايتا ىسكە قوسىلاتىن بولسا، ولاردى «ساۋساعىن كوتەرىپ ۇلگەرگەنشە جويىپ جىبەرەمىن» دەپ سەس كورسەتكەنىن جازدىق.
