قوستاناي وبلىسىنىڭ پوليتسياسى 20 جىل كورىسپەگەن اكەسى مەن قىزىن تابىستىردى
استانا. KAZINFORM — قوستاناي وبلىسىنىڭ پوليتسيا قىزمەتكەرلەرى جوعالعان ادامداردى ىزدەۋدە جانە تۋىستىق بايلانىستاردى قايتا ورناتۋدا جوعارى كاسىبيلىگىن كورسەتتى.
وتكەن جىلى وبلىستىق پوليتسيا دەپارتامەنتىنە تۋىستارىمەن، اتا-انالارىمەن، باۋىرلارىمەن نەمەسە اپكەلەرىمەن بايلانىسىن جوعالتقاندار تۋرالى 110 ءوتىنىش كەلىپ ءتۇستى. جەدەل ءارى ۇيلەسىمدى جۇمىستىڭ ناتيجەسىندە ولاردىڭ 85 ءى تابىلىپ، جاقىندارىمەن قايتا قاۋىشتى.
ادامداردىڭ جوعالۋىنىڭ باستى سەبەپتەرى - بايلانىس ۇزىلگەندىگى، تۇرعىلىقتى جەرى تۋرالى اقپاراتتىڭ بولماۋى جانە تۋىستار اراسىنداعى ۇزاق جىلدىق تۇسىنىسپەۋشىلىكتەر مەن جانجالدار. ماسەلەن، 1995-جىلى 58 جاستاعى الەكساندر حان قازاقستاننان بەلگىسىز سەبەپتەرمەن حابارسىز كەتكەن. ونىڭ قىزى يۋليا حان قوستاناي قالاسىنىڭ پوليتسيا باسقارماسىنا جۇگىنىپ، جوعالعان اكەسىن تابۋعا كومەك سۇرادى.
اكەسىن ىزدەۋ ونىڭ ءومىر بويعى ارمانىنا اينالعان. الەكساندر حاننىڭ 1995-جىلى الىس شەتەلگە تۇراقتى تۇرۋعا كەتىپ، وتباسىمەن بايلانىسىن ۇزگەنىنە قاراماستان، پوليتسيا قىزمەتكەرلەرى يۋليانىڭ ءۇمىتىن ۇزبەي، ىزدەۋ جۇمىستارىن باستادى.
كوشى-قون قىزمەتى ماماندارىنىڭ كاسىبي جانە ۇيلەسىمدى ارەكەتتەرىنىڭ ارقاسىندا الەكساندر حاننىڭ فرانسيادا ۇزاق جىلدار بويى تۇرعانى انىقتالدى. ءارتۇرلى سەبەپتەرمەن ول تۋىستارىمەن بايلانىسىن جالعاستىرا الماعان، ءبىراق قىزىنىڭ تاباندىلىعى مەن پوليتسەيلەردىڭ ەڭبەگى بۇل ولقىلىقتىڭ ورنىن تولتىردى. جيىرما جىلدان كەيىن اكە مەن قىز قايتا قاۋىشىپ، بۇل كەزدەسۋ حان وتباسى ءۇشىن ۇلكەن قۋانىشقا اينالدى.
بۇل وقيعا - ءۇمىتتىڭ قانشالىقتى ماڭىزدى ەكەنىن جانە جاقسىلىققا سەنۋدىڭ ءاردايىم ءوز جەمىسىن بەرەتىنىنە جارقىن مىسال. پوليتسيا قىزمەتكەرلەرىنىڭ كاسىبي جۇمىسى مەن ادامگەرشىلىككە تولى ەڭبەگى ناتيجەسىندە اجىراعان تۋىستىق بايلانىس قايتا ورناپ، وتباسى ءوز جاراسىمىن تاپتى. بۇل جاعداي وتباسى قۇندىلىقتارىن ساقتاۋدا ءتارتىپ ساقشىلارىنىڭ جەكە ۇلەسىنىڭ ماڭىزدىلىعىن تاعى ءبىر رەت دالەلدەدى.
