قوسشىداعى سۋ تاسقىنى باقىلاناتىن رەجيمگە ءوتتى
كوكشەتاۋ. KAZINFORM - قوسشىداعى سۋ تاسقىنى باقىلاناتىن رەجيمگە ءوتتى. تايتوبە اۋىلىندا سۋ تاسقىنىنا قارسى توپىراقتان تۇرعىزىلعان جاساندى بوگەتتى نىعايتۋ جۇمىستارى اياقتالۋدا.
جەرگىلىكتى اتقارۋشى ورگاندار مەن حالىقتىڭ كۇشىمەن بيىلعى جىلى قولدانىستاعى 2400 مەتر بوگەت 1200 مەترگە ۇزارتىلىپ، 2,5 مەترگە بيىكتەتىلدى.
اقمولا وبلىسى اكىمدىگىنىڭ مالىمەتىنشە، جۇمىس ەكى اۋىسىمدا جۇرگىزىلدى. وعان استانادان كەلگەن 30 عا جۋىق ارنايى تەحنيكا تارتىلدى. جەدەل شتاب قوسشى قالاسى مەن تايتوبە اۋىلىنداعى سۋ تاسقىنى جاعدايىنا مونيتورينگ جاسادى. قازىرگى ۋاقىتتا نۇرا وزەنىنىڭ جاعاسى بويىنشا سۋ ماسسالارىنىڭ جوسپارلى اعۋى ءجۇرىپ جاتىر.
اقمولا وبلىسىنىڭ اكىمى مارات احمەتجانوۆ تايتوبە اۋىلىندا جۇرگىزىلىپ جاتقان جۇمىستاردى قاراپ شىقتى.
«بوساڭسۋعا ءالى ەرتە. نەگىزگى سۋ اعىنى نۇرا وزەنى ارقىلى وتكەنىنە قاراماستان، سۋ تاسقىنىنىڭ قاۋپى ءالى سەيىلگەن جوق»، - دەپ اتاپ ءوتتى ءوڭىر باسشىسى.
جالپى، قوسشى قالاسىندا سۋ تاسقىنىنا قارسى شارالارعا بارلىعى 300 ادام تارتىلدى.
ايتا كەتسەك، بۇدان بۇرىن اتباساردا جاباي وزەنىندەگى سۋ قاۋىپتى دەڭگەيدەن اسىپ كەتكەندىگىن جازعان ەدىك.
