قوسشىدا ناۋقاسقا مەديتسينالىق كومەك كورسەتپەگەن فەلشەر 3,5 جىلعا سوتتالدى
كوكشەتاۋ. KAZINFORM - قوسشى قالالىق سوتى ابايسىزدا ناۋقاستىڭ دەنساۋلىعىنا اۋىر زيان كەلتىرۋگە اكەپ سوققان، ناۋقاسقا دالەلدى سەبەپسىز مەديتسينالىق كومەك كورسەتپەگەنى ءۇشىن جەدەل مەديتسينالىق جاردەم فەلدشەرىنە قاتىستى قىلمىستىق ءىستى قارادى (قىلمىستىق كودەكستىڭ 320-بابىنىڭ 2-بولىگى).
اقمولا وبلىستىق سوتى باسپا ءسوز قىزمەتىنىڭ مالىمەتىنشە، سوت ۇكىمىن جاريالايتىن كەزدە وبلىستىق جەدەل مەديتسينالىق جاردەم ستانتسياسىنىڭ، اقمول قوسالقى ستانتسياسىنىڭ جانە قوسشى قالاسى ەمحانالارىنىڭ مەديتسينا قىزمەتكەرلەرى سول جەردە قاتىسىپ وتىرعان.
سوتتا انىقتالعانداي، فەلدشەر جۇرەك اۋىرۋىنا شاعىمدانعان ازاماتشانىڭ ۇيىنە شاقىرۋ بويىنشا كەلىپ، ءتيىستى مەديتسينالىق كومەك كورسەتپەگەن جانە ناۋقاستى اۋرۋحاناعا جەتكىزىپ، جاتقىزۋدان باس تارتقان.
كەيىن ناۋقاس مەديتسينالىق كومەك الۋ ءۇشىن اۋرۋحاناعا ءوز بەتىنشە بارۋعا ءماجبۇر بولعان. اۋرۋحانادا وعان «جۇرەكتىڭ يشەميالىق اۋرۋى. ميوكارد ينفاركتىسى. ستەنتتەۋ. كارديوگەندى شوك. كلينيكالىق ولىمنەن كەيىنگى جاعداي» دياگنوزدارى قويىلدى.
«سوتتا فەلدشەردىڭ كىناسى ساراپتاما قورىتىندىسىمەن، جابىرلەنۋشىنىڭ، كۋاگەرلەردىڭ ايعاقتارىمەن، جەدەل مەديتسينالىق جاردەم فەلدشەرىنە پاتسيەنتتى اۋرۋحاناعا شۇعىل جەتكىزۋدى كوزدەگەن نورماتيۆتىك قۇقىقتىق اكتىلەرمەن جانە ءىستىڭ باسقا دا ماتەريالدارىمەن دالەلدەندى»، - دەدى ۆەدومستۆودان.
جازا تاعايىنداۋدا سوت كىنالىنىڭ جاس بولۋىن، قىلمىستى العاش رەت جاساعانىن نازارعا الدى.
«سوت ۇكىمىمەن كىنالىگە مەديتسينالىق قىزمەت كورسەتۋ قۇقىعىنان ايىرا وتىرىپ، 3 جىل 6 ايعا باس بوستاندىعىن شەكتەۋ جازاسى تاعايىندالدى. سونىمەن قاتار، سوت ابايسىزدا ناۋقاستىڭ دەنساۋلىعىنا اۋىر زيان كەلتىرەتىن جەدەل مەديتسينالىق جاردەم قىزمەتكەرلەرىنىڭ مەديتسينا سالاسىنداعى نورماتيۆتىك قۇقىقتىق اكتىلەردى ورەسكەل بۇزۋشىلىعىنا نازار اۋدارىپ، وبلىستىق دەنساۋلىق ساقتاۋ باسقارماسىنا ءتيىستى شارالار قابىلداۋ ءۇشىن جەكە قاۋلى شىعاردى. سوت اكتىلەرى زاڭدى كۇشىنە ەنگەن جوق»، - دەپ تولىقتىردى اقمولا وبلىسى سوتىنىڭ باسپا ءسوز قىزمەتىنەن.
ايتا كەتسەك، بۇدان بۇرىن اقمولا وبلىسىندا ناۋقاستىڭ شاعىمىن بۇرمالاعان فەلدشەر سوتتالعانىن جازعان ەدىك.
