قونايەۆ اكىمدىگى جابايى ساۋدا ورىندارىمەن قالاي كۇرەسپەك
قونايەۆ. KAZINFORM - قونايەۆتا زاڭسىز ساۋدامەن كۇرەسۋدىڭ جاڭا تەتىگى قولدانىلادى. بۇل تۋرالى شاھاردىڭ بەلگىلەنبەگەن ورىنداردا ساۋدا جاسايتىندارمەن كەزدەسكەن قالا اكىمى اسحات بەردىحانوۆ ايتتى.
اباي كوشەسىنىڭ بويىندا زاڭسىز ساۋدا جاسايتىندار اكىمنەن كۇنكورىس كوزىنەن ايىرماۋدى سۇرادى.
شاھار باسشىسى بولسا، اكىمدىكتىڭ ۇستانىمىن ءتۇسىندىرىپ، ولارعا بىرنەشە تالاپ قويدى.
«بۇعان دەيىن سىزدەرگە «ايشا سيتي» بازارىندا 6 اي، «جەتىسۋ» بازارىندا 3 اي تەگىن ساۋدا جاساۋ ءۇشىن ورىنداردى دايىنداپ بەردىك. تۇتىنۋشى از بولاتىنىن العا تارتىپ، بارمادىڭىزدار. قازىر قالا ۇلكەيىپ، كۇننەن-كۇنگە دامىپ كەلەدى. ماسەلەنى ءبىر جاعىنا شىعارۋىمىز كەرەك. اباتتاندىرىلىپ، ادەمى بولىپ تۇرعان كوشەنىڭ كەلبەتىن زاڭسىز ساۋدا ورىندارى بۇزىپ تۇرعانىن ءبارىمىز ءتۇسىنۋىمىز قاجەت»، - دەدى اسحات بەردىحانوۆ.
سونىمەن قاتار ول تۇرعىنداردان ءجيى شاعىم تۇسەتىنىن اتاپ ءوتتى.
«تۇرعىندار اۋلادا ساۋدا جاسايتىندار قوقىستارىن تاستاپ كەتەتىنىن، اياق الىپ جۇرە المايتىنداي جاعداي تۋعانىن ايتىپ، ءجيى شاعىمدانادى. سىزدەردىڭ قامدارىڭىزدى ويلاپ، پروبلەماعا ءبىرجاقتى قاراۋعا بولمايدى»، - دەدى شاھار باسشىسى.
اكىم تۇيتكىلدى شەشۋ ءۇشىن «ايشا سيتي» بازارىنىڭ الدىنا دۇڭگىرشەكتەر قويىلاتىنىن جەتكىزدى.
«اكىمدىك بارلىق تۇرعىننىڭ قامىن ويلايدى. سول ءۇشىن سىزدەردى تىڭداي كەلە، بازاردىڭ الدىنان دۇڭگىرشەكتەر ورناتۋدى ءجون كورىپ وتىرمىز. ءبىراق، بيزنەس ورىندارى قويىلعاندا سىزدەر جەكە كاسىپكەر رەتىندە تىركەلىپ، سالىق تولەپ، جۇمىس جاساۋلارىڭىز قاجەت»، - دەدى اكىم.
بازار باسشىلىعىنا جاڭادان سالىنىپ جاتقان نىساندى ءبىرىڭعاي ديزاين-كودقا سايكەس ەتىپ جاساۋدى تاپسىردى.
اۆتور
الما مۇقانوۆا
