«قوش بول، كانۆون!»: وليمپيادانىڭ جابىلۋ سالتاناتى ءوتتى
استانا. KAZINFORM - بۇگىن وڭتۇستىك كورەيانىڭ كانۆون قالاسىندا وتكەن IV قىسقى جاس وسپىرىمدەر وليمپياداسىنىڭ سالتاناتتى جابىلۋ ءراسىمى ءوتتى.
Youth Olympic Park سپورت كەشەنىندە ۇيىمداستىرىلعان ءىس-شارادا ەلىمىزدىڭ كوك تۋىن بەرىك بورانبايەۆ پەن مەرەي تاستەمىر ۇستاپ شىقتى.
ەستەرىڭىزگە سالا كەتسەك، وليمپيادانىڭ اشىلۋ سالتاناتىندا قازاقستان تۋىن كونكيمەن جۇگىرۋدەن ۇلتتىق قۇرامانىڭ مۇشەسى كريستينا شۋمەكوۆا مەن شورت-ترەكشى ەراسىل شىڭعىسحان الىپ شىققان بولاتىن.
كانۆون وليمپياداسىندا قازاقستاندىق سپورتشىلار 1 التىن، 2 قولا مەدال جەڭىپ الىپ، جالپى كوماندالىق ەسەپتە 20-ورىنعا تابان تىرەدى.
وليمپيادا ويىندارىندا قازاقستان جاس وسپىرىمدەر قۇراماسى ساپىندا 41 سپورتشى 5 سپورت تۇرىنەن باق سىناپ، 55 جۇلدە جيىنتىعىن ساراپقا سالدى. اتاپ ايتار بولساق، بياتلون، كەرلينگ، كونكيمەن جۇگىرۋ، شورت-ترەك، شايبالى حوككەي، شاڭعى جارىسى، شاڭعىمەن تۇعىردان سەكىرۋ، شاڭعى قوسسايىسى، تاۋ شاڭعىسى، فريستايلدان پاراللەلدى موگۋل بويىنشا سىنعا ءتۇستى.
اتالعان جارىسقا الەمنىڭ 80 گە جۋىق ەلىنەن 1800 سپورتشى قاتىسىپ، جۇلدەلى ورىندارعا تالاستى. جالپى سپورتتىق دودادا 7 سپورت تۇرىنەن (15 ديستسيپلينا) 81 مەدال جيىنتىعى ساراپقا سالىندى.
«كانۆوندا الاۋى تۇتانعان جاس وسپىرىمدەردىڭ قىسقى وليمپياداسى ءوز مارەسىنە جەتتى. قازاقستان قۇراماسىنىڭ جاس اتلەتتەرى كورەيا جەرىندەگى بايراقتى باسەكەدە ەل نامىسىن ابىرويمەن قورعاپ، جانكۇيەرلەردى جۇلدەلەرمەن قۋانتتى. ۇلتتىق قۇرامانىڭ بولاشاق ءىزباسارلارى كانۆوندا 1 التىن، 2 قولا مەدال ولجالاپ، جاس وسپىرىمدەر وليمپياداسىندا بۇرىن-سوڭدى بولماعان تاريحي ناتيجە كورسەتتى. وسىنداي تاماشا جەتىستىككە قول جەتكىزگەن جاس اتلەتتەرىمىزدى وليمپيادانى ءساتتى اياقتاۋىمەن شىن جۇرەكتەن قۇتتىقتايمىن. بارلىق سپورتشىمىز الداعى ۋاقىتتا وزدەرىنە قاجەت بولاتىن قۇندى تاجىريبە جيناپ قايتتى»، - دەدى ەرمەك مارجىقپايەۆ.
تاۋەلسىزدىك جىلدارىندا قازاقستان سپورتشىلارى ءۇش قىسقى جاس وسپىرىمدەر وليمپياداسىنا قاتىسىپ، 5 مەدال جەڭىپ العان بولاتىن. 2012-جىلعى ينسبرۋكتەگى (اۋستريا) وليمپيادادا وتانداستارىمىز 1 كۇمىس، 2 قولا ولجالاسا، ليللەحاممەردە (نورۆەگيا) ەكى قولامەن شەكتەلگەن ەدى. وسىدان 4 جىل بۇرىن لوزاننادا (شۆەيتساريا) وتكەن ويىنداردا وكىنىشكە قاراي، قۇراما قورجىنى بوس قايتقان ەدى.
اۆتوركۇنسۇلتان وتارباي
