قۇتقارۋشىلار اقمولا وبلىسىنداعى اۋىل تۇرعىندارى ءۇشىن وتكەل ۇيىمداستىردى
كوكشەتاۋ. KAZINFORM - اقمولا وبلىسىنىڭ زەرەندى اۋدانىنداعى 16 تۇرعىندى ۇيىنە قايىقپەن جەتكىزۋگە تۋرا كەلدى. بۇعان شاعالالى وزەنىندەگى پونتون كوپىر ارقىلى سۋدىڭ تاسىپ ءوتۋى سەبەپ بولعان، دەپ حابارلايدى Kazinform اگەنتتىگىنىڭ ءتىلشىسى.
اقمولا وبلىستىق توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، سۋ دەڭگەيىنىڭ كۇرت كوتەرىلۋى سالدارىنان شاعالالى وزەنىندەگى پونتون كوپىردى سۋ باسقان.
- بۇل پونتون كوپىر شاعالالى اۋىلىنىڭ نەگىزگى بولىگىن ونىڭ نۇرلى كوشەسىمەن بايلانىستىرادى. اتالعان كوشەدە 28 ءۇي ورنالاسقان. پونتون كوپىر ارقىلى سۋ تاسىپ كەتتى، الايدا كولىك قاتىناسى تولىق ۇزىلگەن جوق، بالاما جول بار. دەگەنمەن جەرگىلىكتى تۇرعىندار مەن جەرگىلىكتى اتقارۋشى ورگانداردىڭ ءوتىنىشى بويىنشا قۇتقارۋشىلار جەدەل تۇردە وتكەل ۇيىمداستىرىپ، 16 ادامدى قايىقپەن ۇيىنە جەتكىزدى. سونداي-اق ولارعا ازىق-تۇلىك ساتىپ الۋعا مۇمكىندىك جاسادى، - دەدى وڭىرلىك توتەنشە جاعدايلار دەپارتامەنتىنىڭ رەسمي وكىلى ەرسايىن قويشىبايەۆ.
سونىمەن قاتار جەرگىلىكتى اتقارۋشى ورگاندار ارنايى تەحنيكانىڭ كومەگىمەن مۇز كەپتەلىسىن جويىپ، كوپىردىڭ زاقىمدانۋىنا جول بەرمەدى.
قازىرگى ۋاقىتتا سۋ تاسقان اۋماقتا جەرگىلىكتى اتقارۋشى ورگان وكىلدەرى، توتەنشە جاعدايلار قىزمەتى مەن پوليتسيا قىزمەتكەرلەرى كەزەكشىلىك ۇيىمداستىرعان.
ەسكە سالايىق، بۇعان دەيىن ت ج م سۋ تاسقىنىنا بايلانىستى جاعدايدى پىسىقتاپ، قاي وڭىرلەرگە سۋ باسۋ قاۋپى ءتونىپ تۇرعانىن زەردەلەدى.
