قۇقىقتىق ءتارتىپ: ءۇش كۇندە ىزدەۋدە جۇرگەن 12 ادام ۇستالدى
استانا. KAZINFORM - كولىكتەگى پوليتسيا دەپارتامەنتىندە «قۇقىقتىق ءتارتىپ» ءىس-شاراسى قورىتىندىلاندى، دەپ حابارلايدى Polisia.kz.
قوعامدىق قاۋىپسىزدىكتى نىعايتۋ جانە كولىك ينفراقۇرىلىمى نىساندارىندا قۇقىق بۇزۋشىلىقتاردىڭ الدىن الۋ ماقساتىندا وسى جىلدىڭ 11-13-جەلتوقسان ارالىعىندا كولىكتەگى پوليتسيا دەپارتامەنتى رەسپۋبليكالىق «قۇقىقتىق ءتارتىپ» جەدەل-پروفيلاكتيكالىق ءىس-شاراسىن وتكىزدى. ءۇش كۇندە 1200 دەن استام قۇقىق بۇزۋشىلىق انىقتالدى.
شارا بارىسىندا كولىك پوليتسەيلەرى 13 قىلمىس پەن قىلمىستىق تەرىس قىلىقتى تىركەدى. ولاردىڭ 12 ى «ءىزىن سۋىتپاي» اشىلدى. جەدەل-ىزدەستىرۋ شارالارى اياسىندا ىزدەۋدە جۇرگەن 12 ادام ۇستالدى.
- ءىس-شارا كەزىندە اكىمشىلىك قۇقىق بۇزۋشىلىقتاردى انىقتاۋ جانە جولىن كەسۋگە ەرەكشە نازار اۋدارىلدى. ناتيجەسىندە 1245 ازامات جاۋاپكەرشىلىككە تارتىلدى. ەڭ كوپ تىركەلگەن قۇقىق بۇزۋشىلىقتار: قوعامدىق ورىنداردا ءتيىسۋ - 108 فاكتى، سونداي-اق الكوگولدىك ىشىمدىكتەردى ءىشۋ جانە قوعامدىق ورىندارعا ماس كۇيىندە كەلۋ - 96 فاكتى. سونىمەن قاتار تۇنگى ۋاقىتتا كولىك نىساندارىندا زاڭدى وكىلدەرىنىڭ ەرىپ ءجۇرۋىنسىز 24 كامەلەتكە تولماعان انىقتالدى. ولاردىڭ 14 ى كامەلەتكە تولماعانداردى بەيىمدەۋ ورتالىعىنا ورنالاستىرىلدى. سونداي-اق كوشى-قون زاڭناماسىن بۇزۋ دەرەكتەرى دە انىقتالىپ، 49 شەتەل ازاماتى اكىمشىلىك جاۋاپكەرشىلىككە تارتىلدى، - دەلىنگەن اقپاراتتا.
قاۋىپسىزدىك شارالارىن كۇشەيتۋ ماقساتىندا پروفيلاكتيكالىق شارانى وتكىزۋگە كينولوگيالىق قىزمەت ورتالىعىنىڭ قىزمەتكەرلەرى تارتىلىپ، قىزمەتتىك-ىزدەستىرۋ يتتەرىمەن جەدەل قىزمەت كورسەتۋ اۋماقتارىندا پاترۋلدەۋ جۇرگىزدى. كولىكتەگى پوليتسيا دەپارتامەنتى كولىك نىساندارىندا قۇقىقتىق ءتارتىپ پەن ازاماتتاردىڭ قاۋىپسىزدىگىن قامتاماسىز ەتۋ باعىتىنداعى جۇمىستى جالعاستىرا بەرەدى.
بۇعان دەيىن قاراعاندى وبلىسىندا قۇقىق بۇزۋشىلىقتاردىڭ الدىن الاتىن QR-كود جوباسى ىسكە قوسىلعانى تۋرالى جازدىق.
