قازىرگى الەۋمەتتانۋشىلاردى قوعامداعى قانداي ماسەلەلەر مازالايدى

الماتى. KAZINFORM - الماتىدا «قازىرگى الەمدەگى بىرەگەيلىك ماسەلەلەرى: الەۋمەتتانۋلىق ولشەم» تاقىرىبىندا تۇركىتىلدەس ەلدەر الەۋمەتتانۋشىلارىنىڭ قاتىسۋىمەن قازاقستان الەۋمەتتانۋشىلارىنىڭ كەزەكتى VIII كونگرەسى ءوتىپ جاتىر.

ءىس-شارا قازاقستان الەۋمەتتانۋشىلار قاۋىمداستىعىنىڭ باستاماسىمەن ۇيىمداستىرىلدى. كونگرەس بارىسىندا قازاقستان، تۇركيا، رەسەي، وزبەكستان جانە وزگە دە مەملەكەتتەردەن كەلگەن جەتەكشى عالىمدار مەن ساراپشىلاردى الەۋمەتتىك عىلىمداردىڭ ءارتۇرلى سالالارى اراسىندا دەرەكتەرمەن، ادىستەرمەن جانە تەوريالارمەن الماسادى.

- ءبىزدىڭ فورۋمنىڭ نەگىزگى تاقىرىبى - الەۋمەتتىك ۇقساستىق، ياكي الەۋمەتتىك بىرەگەيلىك. مەنىڭشە، الەۋمەتتىك ۇقساستىق ءسوزىن قولدانعان دۇرىس. سەبەبى اعىلشىن ءتىلىنىڭ «social identity» سوزىنەن اۋدارىلادى. بۇل تاقىرىپتى ءبىراز ويلانىپ تاڭدادىق. سەبەبى قازىرگى كەزدە الەۋمەتتىك ۇقساستىق قوعامدى بىرىكتىرۋشى فاكتورعا اينالىپ تۇر. سونداي-اق الەۋمەتتىك ۇقساستىق بۇگىنگى جانە ەرتەڭگى ساياساتپەن تىعىز بايلانىستى. سوندىقتان بۇل تاقىرىپ وتە ماڭىزدى جانە وزەكتى، - دەدى قازاقستان الەۋمەتتانۋشىلار قاۋىمداستىعىنىڭ پرەزيدەنتى مارات ءتاجين.

ال قولدانبالى ەتنوساياسي زەرتتەۋلەر ينستيتۋتىنىڭ ديرەكتور ورىنباسارى، الەۋمەتتانۋ عىلىمدارىنىڭ دوكتورى ايگۇل ءسادۋاقاسوۆا الەم الەۋمەتتانۋشىلارىنىڭ الدىندا تۇرعان باستى سۇراققا توقتالدى. ونىڭ ايتۋىنشا، سيفرلىق قۇرالداردىڭ دامۋىمەن ادامدار ءوز سايكەستىگىن ءارتۇرلى ورتالاردان ىزدەي باستاعان.

- ءار ادامنىڭ بەلگىلى ءبىر ورتامەن بايلانىسى بولادى. ءبىراق سيفرلىق الەم وسكەن سايىن ادام ءوزىنىڭ سايكەستىگىن قايدان ىزدەيدى، نە نارسەگە سۇيەنەدى، قاي توپتان قۇندىلىق الادى دەگەن سۇراق بارشا الەمنىڭ الەۋمەتتانۋشىلارىنىڭ الدىندا تۇر. ءبىز ۇيرەنگەن وتباسىلىق، ەتنوستىق، كاسىبيلىك سايكەستىك بار. الايدا قازىرگى ۋاقىتتا بۇل وتە قۇبىلمالى بايلانىس، - دەدى ول.

ايتا كەتكەن ءجون، قازاقستان الەۋمەتتانۋشىلار قاۋىمداستىعى - 2002 -جىلى سوتسيوگۋمانيتارلىق باعىتتاعى عالىمداردىڭ كۇشىن بىرىكتىرۋ ماقساتىندا قۇرىلعان قوعامدىق كاسىبي بەرلەستىك. 2003 -جىلدان باستاپ ءقاق حالىقارالىق الەۋمەتتانۋلىق قاۋىمداستىقتىڭ تۇراقتى مۇشەسى.

ەسكە سالايىق، بۇعان دەيىن الماتىدا قازاقستان مەن اۋعانستان اراسىنداعى ساۋدا- ەكونوميكالىق ىنتىماقتاستىقتى دامىتۋعا باعىتتالعان «قازاقستان- اۋعانستان» بيزنەس- فورۋمى وتكەنىن جازعانبىز.

اۆتور
دوسبول اتاجان