قازىر جاڭا سالماققا بەيىمدەلىپ جاتىرمىن - بوكسشى تورەحان سابىرحان

استانا. قازاقپارات – 30-ماۋسىمدا ەلوردادا بوكستان الەم كۋبوگىنىڭ كەزەكتى كەزەڭى باستالادى. سوعان بايلانىستى ۇلتتىق قۇرامانىڭ جاس سپورتشىلارىنىڭ ءبىرى تورەحان سابىرحان Olympic.kz سايتىنا بەرگەن سۇحباتىندا نە ءۇشىن جارىسقا قاتىسپايتىنىن ايتىپ، الداعى جوسپارى تۋرالى ايتتى.

بوكسشى قازىر جاڭا سالماققا بەيىمدەلىپ جاتقانىن اتاپ ءوتتى.

- دايىندىق وتە جوعارى دەڭگەيدە ءوتىپ جاتىر. وقۋ-جاتتىعۋ جيىنى باستالعان ساتتەن-اق ا ق ش قۇراماسىنىڭ سپورتشىلارى كەلىپ، بىرلەسىپ جاتتىعۋدامىز. ءبىر-بىرىمىزبەن تاجىريبە الماسىپ، پايدالى دۇنيەلەردى ۇيرەنىپ جاتىرمىز. قازىر ءوزىمنىڭ سالماعىمدى 67 دەن 70 كەلىگە كوتەرىپ، جاڭا سالماققا بەيىمدەلۋ ۇستىندەمىن. الدا U22 ازيا چەمپيوناتى وتەدى، سول دوداعا قاتىسۋعا مۇمكىندىك تۋىپ قالۋى مۇمكىن. الداعى جارىسقا مەن قاتىسپايمىن. بۇل جولى 70 كەلى سالماق دارەجەسىندە ابىلايحان اعامىز باق سىنايدى. ابىلايحان اعانىڭ بۇل سالماقتاعى تاجىريبەسى مول. سوندىقتان باپكەرلەر شتابى ءدال وسى جارىسقا ونى شىعارۋدى ءجون دەپ تاپتى. ارينە، باپكەردىڭ شەشىمى - ءبىز ءۇشىن زاڭ. ازىرگە مەن وسى سالماق دارەجەسىندە ەكىنشى ءنومىرلى سپورتشىمىن، - دەپ ءبولىستى سپورتشى.

ايتا كەتەيىك، استانادا وتەتىن الەم كۋبوگىندا 30 مەملەكەتتىڭ بوكسشىلارى باق سىنايدى.

موڭعوليا ەلىنىڭ بوكسشىلارى استاناعا ات باسىن بۇردى.