قازسەلدەنقورعاۋ مەكەمەسى اقساي بوگەتىنە قاتىستى تۇسىنىك بەردى

الماتى. KAZINFORM — «قازسەلدەنقورعاۋ» مەكەمەسى اقساي بوگەتىنە قاتىستى تۇسىنىكتەمە بەردى.

مەكەمە باسشىسى ارمان احمەتوۆتىڭ ايتۋىنشا، اقساي وزەنى الماتى قالاسىنداعى سەل قاۋپى بار وزەندەردىڭ بىرىنە جاتادى. ونىڭ جوعارعى اعىسىندا 25 مۇزدىق پەن 20 مورەنو-مۇزدىق كولى ورنالاسقان.

«اقساي سەلدى ۇستاۋ بوگەتىنىڭ قۇرىلىسى ماڭىزدى. ونىڭ ماقساتى سەل ايماعىندا ورنالاسقان حالىقتىڭ ءومىرى مەن شارۋاشىلىق نىساندارىن قورعاۋ. سەل قاۋپى ايماعىندا 30 مىڭنان استام ادام بار. قازىرگى ۋاقىتتا مەردىگەر ءوز مىندەتتەمەلەرىن ورىنداماعاندىقتان نىساننىڭ قۇرىلىسى توقتاتىلىپ، ءتيىستى كەلىسىمشارت بۇزىلدى»، - دەدى ول.

ونىڭ ايتۋىنشا، قازىر مورەنالىق كولدەر قىسقى رەجيمدە، بوگەتتىڭ جارىلۋ قاۋپى جوق.

بۇعان دەيىن قارجىلىق مونيتورينگ اگەنتتىگى الماتىنى سەلدەن قورعاۋ ءۇشىن اقساي وزەنىنىڭ باسسەينىنە بوگەت سالۋعا مىندەتتەلگەن مەردىگەر كومپانيا مەملەكەتكە 775 ميلليون تەڭگە زالال كەلتىرگەنىن حابارلاعان بولاتىن.

كەيىن توتەنشە جاعدايلار مينيسترلىگى «اقساي» باسسەينىندەگى سەلدى ۇستايتىن بوگەتتى سالعان مەردىگەرگە قىلمىستىق ءىس قوزعالعانىن مالىمدەدى.