قازاقتىڭ ۇلتتىق سۋسىنىن بيزنەسكە اينالدىرعان ۇلىتاۋلىق كاسىپكەر
استانا. KAZINFORM - ۇلىتاۋ وبلىسى بايدالى ءبي اۋىلىنىڭ تۇرعىنى زاۋرەش جاركەنوۆا ۇلتتىق سۋسىن - اشىعان كوجەنى قايتا جاڭعىرتىپ، بيزنەس كوزىنە اينالدىرعان. پايدالى استىڭ ەرەكشەلىگى جايلى Kazinform ءتىلشىسى جازادى.
اشىعان كوجەنى دايىنداۋ ءادىسى قاراپايىم بولعانىمەن، ءدامىن كەلتىرۋ ءۇشىن اركىم ءارتۇرلى ازىرلەيدى. زاۋرەش اپانىڭ بۇل رەتتە ءوز قۇپياسى بار. ول سيىر سۇتىنە ۇن قوسىپ قايناتادى، كەيىن سالقىنداتىپ قويادى.
- ءسۇت قانا قوسساق، سىلدىر سۋ بولىپ كەتەدى. سوندىقتان كوجە قويۋلانسىن دەپ ۇن قوسامىن. ۇندى كوپ قوسۋعا دا بولمايدى. ناقتى ءبىر كولەمى بار. تۇتىنۋشىلاردىڭ كوبىسى قىمىزدان گورى وسى سۋسىندى الادى. ايتۋلارىنشا، تاماق ىشكەننەن كەيىن اسقازاندى قورىتۋعا جاقسى اسەر ەتەدى. ءشولدى دە باسادى. حالىق تويعا، قۇران وقىتقاندا دا وسى اشىعان كوجەنى ساتىپ الىپ جاتادى، - دەيدى بايدالى بي اۋىلىنىڭ تۇرعىنى زاۋرەش جاركەنوۆا.
63 جاستاعى زەينەتكەردىڭ قازىرگى ءىسى وسى. پايداسى دا جامان ەمەس. ايىنا 300000 تەڭگەگە جۋىق تابىس تابامىن دەيدى زاۋرەش اپا.
- سوۆحوز تاراعان سوڭ، 1994 -جىلى مەن سۇتپەن اينالىسا باستادىم. الدىمەن ءسۇت ساتتىم، سوسىن اشىعان كوجە دايىنداۋدىڭ ەرەكشە ءتاسىلىن ۇيرەنىپ الدىم. ناتيجەسىندە وسى سۋسىننان پايدا كوپ تاپتىم. مىنە، بيىل وسى بيزنەسپەن اينالىسقانىما 30 جىل بولدى. بالالارىمىزدى وسى كاسىپتىڭ ارقاسىندا وقىتىپ، جەتكىزىپ، ۇيلەندىردىك، - دەيدى زاۋرەش جاركەنوۆا بايدالى ءبي اۋىلىنىڭ تۇرعىنى.
تاعى ءبىر ەرەكشەلىگى - سۋسىندى شەلەككە ەمەس، كۇبىگە اشىتادى. سەبەبى اعاش تەمپەراتۋرا مەن ىلعالدىلىقتى ءبىرقالىپتا ۇستاپ، پايدالى دارۋمەندەر كوبەيۋىنە ىقپال ەتەدى.
- كۇبىگە ءبىز قايماق جاعىپ، ىستايمىز. سوندىقتان اشىعان كوجەدە ىستىڭ ءدامى بولادى. سوسىن ءدامىن تاتقاندا، كوپشىلىك قىمىز دەپ قالادى، - دەيدى زاۋرەش جاركەنوۆا.
ۇلىتاۋلىڭ سۋسىندى ەلوردادان دا تاپسىرىس بەرىپ الدىرتاتىندار از ەمەس ەكەن.
- مەن استانا قالاسىنىڭ تۇرعىنىمىن. اشىعان كوجەنى بىرنەشە شاقىرىم قاشىقتىقتا ورنالاسقان بايدالى ءبي اۋىلىنا تاپسىرىس بەرەمىز. زاۋرەش تاتەنىڭ اشىعان كوجەسى بالداي. ءبىر رەت تاپسىرىس بەرگەندە، بىرنەشە ليترگە بەرەمىز. سوسىن تۋعان-تۋىس، كورشى ماڭايعا تاراتامىز، - دەيدى استانا قالاسىنىڭ تۇرعىنى التىن بايقانوۆا.
زەينەتكەر كۇنىنە 100 ليتر اشىتادى. ءسۇت جەتپەسە، اۋىل تۇرعىندارىنان ساتىپ الادى. ياعني بۇل بيزنەس تەك ءبىر اۋلەتتى عانا ەمەس بىرنەشە وتباسىنا تابىس كوزى بولىپ وتىر.
- اۋىلدا بۇرىن ءسۇت قابىلدايتىن پۋنكت بولاتىن. ءقازىر جۇمىس ىستەمەيدى. ال قازىر تۇرعىندار بىزگە تاپسىرادى. ءبىز ءسۇتتى ساتىپ الىپ، ونى ىسكە جاراتامىز. سوندىقتان بۇل بيزنەستىڭ پايداسى كۇللى اۋىلعا وڭ اسەرىن تيگىزىپ جاتىر، - دەيدى كاسىپكەر مىڭجان ساتبەرگەنوۆ.
وسىعان دەيىن ەلىمىزدە ءسۇت وندىرۋدە اۋىل شارۋاشىلىعى قۇرىلىمدارىنىڭ ۇلەسى 39 پايىزعا جەتكەنى جايلى حابارلاعان بولاتىنبىز.
اۆتور
ايزادا اگيلبايەۆا
