قازاقتىڭ العاشقى كاسىپقوي بوكسشىسى ومىردەن وزدى

قازاق بوكسشىلارىنان ءبىرىنشى بولىپ كاسىپقوي بوكسقا بەت بۇرعان ەسبولات نۇرمانوۆ 53 جاسىندا دۇنيەدەن وزدى، دەپ حابارلايدى Kazinform.

بۇل تۋرالى ع. مۇسىرەپوۆ اتىنداعى قوعامدىق قوردىڭ ديرەكتورى عابيدەن جاكەي Facebook-تەگى پاراقشاسىندا حابارلادى.

«سۋىت حابار... بوكسشى ەسبولات نۇرمانوۆ ماڭگىلىك مەكەنىنە اتتانىپتى. ەگەمەن ەلدىڭ تۇڭعىش كاسىپقوي بوكسشىسى، 17 جاسىندا بوكستان س س س ر قۇراما كومانداسىنىڭ مۇشەسى بولعان، حالىقارالىق دارەجەدەگى سپورت شەبەرى ەدى. ول ارال ءوڭىرىنىڭ تۋماسى. ەكەۋمىز سوناۋ 1987-جىلى لەنين اتىنداعى قاز پ ت ي- نىڭ گيدروگەولوگيا، بارلاۋ تەحنيكاسى فاكۋلتەتىندە ءبىر توپتا وقىدىق. 1990-جىلداردىڭ ورتاسىنان كەدەن قىزمەتىندە جۇمىس ىستەدى. يمانىڭ سالامات بولسىن»، - دەپ جازدى عابيدەن جاكەي.

ەسبولات نۇرمانوۆ - توقسانىنشى جىلداردىڭ باسىندا وتاندىق بىلعارى قولعاپ شەبەرلەرى اراسىندا كاسىپقوي بوكسقا العاش بولىپ قادام باسقان سپورتشى.

ول (29.02.1970 ج.-4.12.2023 ج) كاسىپقوي بوكستا 7 رەت شارشى الاڭعا شىققان. 1993-جىلدىڭ 27- ناۋرىزىندا ۋكراينانىڭ ماريۋپول قالاسىندا يزرايلدىك بوكسشىعا قارسى العاشقى كەزدەسۋىن وتكىزگەن. 1995-جىلدىڭ 9- جەلتوقسانىندا بولعان سوڭعى جەكپە-جەگىندە ليتۆالىق بوكسشىمەن جۇدىرىقتاسقان.

اۆتور كۇنسۇلتان وتارباي