قازاقتارمەن بولعان كوكپاردان ەسىمىزدى ارەڭ جيدىق - امەريكالىق كوۆبوي
استانا. قازاقپارات - ءتىلشىسى دۇنيەجۇزىلىك كوشپەندىلەر ويىندارىنداعى كوكپارشىلاردىڭ ويىنىن تاماشالاپ، الەۋمەتتىك جەلىدە ۆيدەو روليكتەرى ارقىلى تانىمال بولعان امەريكالىق جانە وتاندىق ويىنشىلاردىڭ ويىن كەزىندەگى اسەرلەرىن ءبىلىپ قايتتى.
ەلورداداعى «قازانات» يپپودرومى... شيرەك فينال. تارتىس! ىسقىرعان، شۋلاعان جانكۇيەرلەردىڭ داۋىسى مەن اتتاردىڭ تۇياق ءدۇرسىلى ارالاسىپ شىعىپ جاتتى. الاڭدا قازاقتىڭ كوكپارشىلارى مەن الىستان كەلگەن امەريكالىق كوماندا ويىنشىلارى. ويىننىڭ ەرەجەسى سولاي: بىرەۋلەرى جەڭىپ، بوركىن اسپانعا اتادى، بىرەۋلەر جەڭىلەدى. بۇل جولى الاڭنىڭ شاڭىن قوسا جۇتىپ، جانكۇيەرلەرمەن بىرگە جەڭىلىستىڭ سالماعىن سەزىنگەن - ۆيل گرانت باستاعان USA Kokpar Team ويىنشىلارى. «قازاقتارمەن بولعان ويىننان ەسىمىزدى ارەڭ جيدىق» دەپ مويىندادى ولار.
كوكپار كوۆبويلارعا قالاي كەلدى؟
كوۆبويلار كوكپار وينايدى دەپ كىم ويلاعان؟! امەريكا ءۇشىن بۇل - سپورتتىڭ كەيىننەن اشىلعان جاڭا ءتۇرى. كوۆبويلار العاش رەت كوكپاردى 2018 -جىلى كورىپ، قىزىعا باستاعان. بىردەن USA Kokpar Team كوۆبويلار كومانداسى قۇرىلىپ، دۇنيەجۇزىلىك كوشپەندىلەر ويىنىنا قاتىسۋ ءۇشىن ءوتىنىم بىلدىرگەن. سودان بەرى ولاردىڭ بۇل ەرمەگى ۇردىسكە اينالىپ، ات باسىن قازاقستانعا بۇردى. توپ مۇشەلەرى اۋەسقوي بولعانىمەن، جىگەرلەرى مىقتى - سايىسقا كاسىبي كوكپارشىلارمەن شىعۋدان يمەنبەپتى. ويتكەنى كوۆبويلار ءۇشىن جەڭىسكە جەتۋدەن گورى، جىلقىنىڭ جانىنداعى رۋح پەن كوشپەندىلەر مادەنيەتىن تەرەڭ سەزىنۋ ماڭىزدى.
«قازاقستان بىزگە ۇناپ جاتىر. حالقىڭىزدىڭ قوناقجايلىعى تاڭعالدىردى. بۇل ءبىزدى ەرەكشە شابىتتاندىرادى. سپورتشىلارىڭىزدىڭ اشىقتىعى مەن مەيىرىمدىلىگى ءبىزدى كوكپارعا دەگەن سۇيىسپەنشىلىگىمىزدى ودان سايىن كۇشەيتتى»، - دەيدى ۆيل گرانت، ولاردىڭ جەتەكشىسى.
بۇل كوكپار جايىندا كىتاپتا جازىلادى
ۆيل گرانت ورتالىق ازيا جىلقىلارىن زەرتتەپ، كىتاپ جازىپ جۇرگەن ويىنشى ەكەن. ادامدار مەن جىلقىلاردىڭ بايلانىسىن ءبىراز جىل باقىلاپ كەلەمىن دەگەن كەيىپكەرىمىز - قازاقتار مەن جىلقىلاردىڭ بايلانىسى وزگە ەلدىكىنە ۇقسامايتىنىن ايتتى.
«كىتاپتا جىلقىلار مەن ادامدار اراسىنداعى قارىم-قاتىناس جايلى بولادى. بۇل تاقىرىپتى ۇزاق ۋاقىت زەرتتەپ كەلەمىن. وسى جولعى ساپارىمدا ەلدەرىڭىزدە قالىپ، زەرتتەۋىمدى جالعاستىرامىن دەپ ويلاعان ەدىم. ءبىراق كوكپار بارىسىندا قولىمدى جاراقاتتاپ الىپ، ەلگە قايتاتىن بولدىم. ارىپتەستەرىم ناۋرىز ايى، اۋا رايى جاقسارعان كەزدە كەل دەدى. كىتاپتا قازاقتاردىڭ جىلقىلارمەن بايلانىسى جايلى دا جازۋدى جوسپارلاپ وتىرمىن. سەبەبى قازاقتار مەن جىلقى جانۋارىنىڭ بايلانىسى وزگە حالىقتاردىكىنە ۇقسامايدى. مەن سونى قاراپ، ءارى قاراي زەرتتەگىم كەلەدى. سونداي-اق قازاقتاردىڭ جىلقى ەتىن ءسۇيىپ جەيتىنىن بىلەمىن. ماعان دا جىلقى ەتى ۇنايدى»، - دەپ وي ءبولىستى ۆيل.
«ءبىزدى بايلانىستىراتىن جىلقى»
«كوشپەندىلەر ويىندارى سپورتشىلاردىڭ ءبىر-بىرىمەن بايلانىسۋىنا، جاڭا مادەنيەتتى تانۋىنا ىقپال ەتەدى. بۇل جەردە ەشقانداي ساياسات جوق، ويىن نەگىزىندەگى ءوزارا دوستىق سايىستار. جارىسقا شىققاندا قارسىلاسپىز، جارىس اياقتالعاننان سوڭ دوسپىز. جانە ءبىزدى بايلانىستىرعان جىلقى»، - دەپ تۇيىندەدى ءسوزىن ۆيل گرانت.
شيرەك فينالدىڭ شەشۋشى ساتتەرى
شيرەك فينال ويىندارى استاناداعى «قازانات» يپپودرومىندا ءوتىپ، قازاقستان قۇراماسى ا ق ش كومانداسىن 12:4 ەسەبىمەن جەڭدى. ويىن بارىسىندا قازاقستاندىق كوكپارشىلاردىڭ ەپتىلىگى مەن شەبەرلىگى ەرەكشە بايقالدى. ال قىرعىزستان كوكپارشىلارى تۇركيا قۇراماسىن 15:1 ەسەبىمەن باسىمدىقپەن جەڭدى.
جارىس قازاقستان رەسپۋبليكاسىنىڭ كوكپار فەدەراتسياسىنىڭ ەرەجەلەرى بويىنشا ءوتىپ جاتىر. سايىس 20 مينۋتتىق ەكى كەزەڭنەن تۇرادى، ال ءۇزىلىس 10 مينۋتتى قۇرايدى. سەركەنىڭ ورنىنا سالماعى 30-33 ك گ تارتاتىن ءناقپىشىن پايدالانىلادى.
بۇل جارىسقا 9 ەلدىڭ كوماندالارى قاتىستى، ونىڭ ىشىندە قازاقستان، ا ق ش، رەسەي، وزبەكستان، قىرعىزستان، ماجارستان، قىتاي، موڭعوليا جانە تۇركيا كوماندالارى بار. شيرەك فينال ناتيجەسىندە قازاقستان، قىرعىزستان، رەسەي جانە تۇركيا كوماندالارى جارتىلاي فينالعا جولداما الدى.
ايتا كەتەيىك، V دۇنيەجۇزىلىك كوشپەندىلەر ويىندارى استانادا 8-13-قىركۇيەك ارالىعىندا وتەدى. ءدۇبىرلى دوداعا الەمنىڭ 89 ەلىنەن 2430 قاتىسۋشى تىركەلدى، قازاقستان قۇراماسىنان 261 سپورتشى قاتىسادى. كوشپەندىلەر ويىندارىندا 21 سپورت ءتۇرى بويىنشا 97 مەدال جيىنتىعى ساراپقا سالىنادى. مەدالدىڭ جالپى سانى - 581 دانا. كوشپەندىلەر ويىندارىنان شامامەن 400 شەتەلدىك باق حابار تاراتادى.
Massaget.kz
