قازاقستاننىڭ ۇزدىك قىمىز وندىرۋشىلەرى انىقتالدى

استانا. KAZINFORM - استانادا وتكەن اۋقىمدى «BaiQymyz - باپتالعان قىمىز» گاستروفەستيۆالى ءوز دەڭگەيىنە جەتتى.

ۇيىمداستىرۋشىلاردىڭ مالىمەتىنشە، قازاقتىڭ ۇلتتىق سۋسىنى - قىمىزعا ارنالعان بۇل مادەني ءىس-شارا ەكى كۇن بويى 70 مىڭنان استام قوناقتى قابىلداپ، قازاقي رۋحتاعى ءدام مەن ءداستۇردىڭ مەرەكەسىنە اينالدى.

فوتو: بەيبارىس انۋار

فەستيۆالدىڭ ەڭ ماڭىزدى ساتتەرىنىڭ ءبىرى - ەلىمىزدىڭ تۇكپىر-تۇكپىرىنەن كەلگەن قىمىز وندىرۋشىلەر اراسىندا وتكەن «ەڭ ۇزدىك قىمىز» بايقاۋى بولدى. جەڭىمپازدار فەستيۆال قوناقتارىنىڭ داۋىس بەرۋى ارقىلى انىقتالىپ، قوماقتى قارجىلاي سىياقىمەن ماراپاتتالدى.

«ەڭ ۇزدىك قىمىز» بايقاۋىنىڭ جەڭىمپازدارى:

• I ورىن - اباي وبلىسى، سارجال اۋىلى، «جانىس» شارۋا قوجالىعى - 20 ميلليون تەڭگە؛

• Ⅱ ورىن - قاراعاندى وبلىسى، قارقارالى قىمىزى، «قارىنشي» شارۋا قوجالىعى - 15 ميلليون تەڭگە؛

• Ⅲ ورىن - اقمولا وبلىسى، قىمىزناي قىمىزى، «قابدۋلين» شارۋا قوجالىعى - 10 ميلليون تەڭگە.

سونداي-اق Zhanykulov Foundation قورى تاعايىنداعان ارنايى نوميناتسيالار بويىنشا دا ۇزدىكتەر ماراپاتتالدى:

• «التىن كۇبى» نوميناتسياسى - قاراعاندى وبلىسى، «باتىر رۋح» - 1 ميلليون تەڭگە؛

• «التىن قور» نوميناتسياسى - ۇلىتاۋ وبلىسى، جاڭارقا، Nomad milk» - 1» ميلليون تەڭگە؛

• «كۇمىس تورسىق» نوميناتسياسى - اباي وبلىسى، قاراۋىل اۋىلى، «ءادىل قىمىز» - 500000 تەڭگە؛

• «تەكتى سۋسىن - كۇمىس شارا» نوميناتسياسى - اقمولا وبلىسى - 500000 تەڭگە.

فوتو: بەيبارىس انۋار

ودان بولەك فەستيۆال اياسىندا «ەر قاناتى» اتتى جىلقى كورمەسى ءوتتى. اتالعان ءىس-شارانى 3000 نان استام ادام تاماشالادى. ەليتالى تۇقىمدار - گوننوۆەر، تازا قاندى اعىلشىن، ورىس جەلىستى، احالتەكە جىلقىلارى مەن قازاقى تۇقىمدار: جابى، مۇعالجار، قوستاناي، بەسقاراعاي جانە «ۇلى دالا جورىعى» بايگەسىنىڭ چەمپيوندارى كەلۋشىلەر نازارىن اۋدارتتى.

كورمە جەڭىمپازدارى:

• «قازاقتىڭ ەڭ سۇلۋ جىلقىسى» نوميناتسياسى - مۇعالجار تۇقىمى

• «قازاقتىڭ ەڭ جۇيرىك جىلقىسى» نوميناتسياسى - قوستاناي تۇقىمى

ەسكە سالساق، ەلوردادا «BaiQymyz» ۇلتتىق تاعامدار گاستروفەستيۆالى ءوتتى.

بايقاۋدىڭ ماقساتى - ەلىمىزدەگى ەڭ ساپالى ءارى شيپالى قىمىزدى انىقتاۋ. نەگىزگى ماقسات - قىمىزدى دەنساۋلىق پەن قوناقجايلىقتىڭ سيمۆولى رەتىندە تانىتۋ، سونىمەن قاتار اگروتۋريزم مەن جىلقى شارۋاشىلىعىن دامىتۋعا سەرپىن بەرۋ.

سونداي-اق قىمىز فەستيۆالىنە ەل وڭىرلەرىنەن 30 تونناعا جۋىق قىمىز اكەلىندى، وسى ورايدا ۇيىمداستىرۋشىلار رەكورد ورناعانىن ايتىپ وتىر.

اۆتور

داۋلەت ىزتىلەۋ