قازاقستاننىڭ قاي وڭىرلەرىندە رەسەي رۋبلىنە سۇرانىس جوعارى
استانا. قازاقپارات - 2025 -جىلدىڭ العاشقى ءۇش ايىندا ەلدەگى ۆاليۋتا ايىرباستاۋ بەكەتتەرى ىشكى نارىقتا 369,2 ميلليارد تەڭگەگە دوللار، 79,6 ميلليارد تەڭگەگە ەۋرو، 547,3 ميلليون تەڭگەگە فۋنت- ستەرلينگ، 161 ميلليون تەڭگەگە يۋان ساتسا، قازاقستاندىقتاردان 40,9 ميلليارد تەڭگەنىڭ رۋبلىن ساتىپ العان.
وڭىرلەر اراسىندا شىمكەنت (86,5 ميلليارد تەڭگەگە)، الماتى (85,6 ميلليارد تەڭگەگە)، استانا (35,2 ميلليارد تەڭگەگە) قالالارى مەن ماڭعىستاۋ (31,2 ميلليارد تەڭگەگە) جانە اتىراۋ (25,1 ميلليارد تەڭگەگە) وبلىستارىنىڭ تۇرعىندارى دوللار كوپ ساتىپ العان.
ال رەسەي رۋبلىن كوپ ساتىپ الۋشىلار - شىعىس قازاقستان (1,2 ميلليارد تەڭگەگە)، قاراعاندى (1,1 ميلليارد تەڭگەگە)، اقمولا (669,8 ميلليون تەڭگەگە) وبلىستارىنىڭ تۇرعىندارى.
ۇلتتىق بانكتىڭ Kazinform اگەنتتىگىنە بەرگەن مالىمەتى بويىنشا، بانكتەن تىس ايىرباستاۋ بەكەتتەرىنىڭ كوبى ءىرى قالالاردا شوعىرلانعان. جالپى ەلدەگى بۇكىل ايىرباستاۋ پۋنكتىنىڭ %37 ى - الماتى، استانا مەن شىمكەنت قالالارىندا ورنالاسقان. وبلىس ورتالىقتارى مەن وبلىستىق ماڭىزى بار قالالاردا - %40 ى، وزگە مارتەبەسى بار ەلدى مەكەندەردە %23 ى ورنالاسقان.
- ەڭ كوپ ايىرباستاۋ پۋنكتى بار قالا - الماتى (%20). ەڭ ءىرى وكىلەتتى ۇيىم - الماتى قالاسىنداعى «ميگ» ج ش س، ونىڭ يەلىگىندە 33-ايىرباستاۋ پۋنكتى بار، - دەپ جازىلعان رەسمي جاۋاپتا.
ايتا كەتەيىك، كەشەگى مالىمەت بويىنشا استانا مەن الماتى قالالارىندا دوللار 510-516 تەڭگەدەن ساتىلىپ جاتىر.
اۆتور
ەسىمجان ناقتىباي
