قازاقستاننىڭ حالىق جازۋشىسى تەمىرحان مەدەتبەك دۇنيەدەن وزدى
استانا. KAZINFORM - قازاقستاننىڭ حالىق جازۋشىسى، كورنەكتى اقىن تەمىرحان مەدەتبەك دۇنيەدەن وزدى. قارالى حاباردى جازۋشىلار وداعى باسقارما ءتوراعاسىنىڭ ورىنباسارى قاسىمحان بەگمانوۆ جاريالادى.
- قازاق پوەزياسىنا قۇبىلىس بولىپ كەلگەن، ۇلتتىڭ اسقاق رۋحتى ۇلى اقىنى تەمىرحان مەدەتبەك دۇنيەدەن ءوتتى.
قارشادايىمنان ولەڭدەرىن وقىپ، قاسىنا ەرگەن اسىل اعام، قازاقستاننىڭ حالىق جازۋشىسى، قازاقستان مەملەكەتتىك سىيلىعىنىڭ لاۋرەاتى، كورنەكتى اقىن تەمىرحان مەدەتبەكتىڭ دۇنيەدەن وزعانىن قازىر عانا شولپان جەڭگەم ماعان ەڭ ءبىرىنشى حابارلادى.
سوڭعى اپتادا تەمىرحان اعامىزدىڭ اۋىر حالدە اۋرۋحاناعا تۇسۋىنە بايلانىستى وتباسىمەن، دارىگەرلەرمەن جازۋشىلار وداعىنىڭ باسشىلارى ۇنەمى حابارلاسىپ تۇردى.
قازاقستان جازۋشىلار وداعىنىڭ ءتوراعاسى مەرەكە قۇلكەنوۆ ەكەۋىمىز ەكى كۇن بارعاندا جانساقتاۋ بولىمىنە كىرگىزبەگەن سوڭ، مەن «اعا، ءبىز كەلىپ تۇرمىز، جانىڭىزدامىز» دەپ حات جازىپ، قالدىرىپ كەتىپ ەدىم.
بۇگىن مەرەكە قۇلكەنوۆ، ونىڭ كەڭەسشىسى ءامىرجان قوسانوۆ جانە بەلگىلى كاسىپكەر قانات سانىك تورتەۋمىز الماتىداعى اۋرۋحانادا - اعامىز جاتقان جانساقتاۋ بولىمىنە كەزەكپەن كىرىپ، ءۇنسىز باقۇلداسىپ، قوشتاسىپ شىققان ەدىك.
ءيا، وتكەندە عانا اعامىزدىڭ 80 جاسىن دۇركىرەتىپ الماتىدا تويلاعان ەدىك. 81 جاسىندا ومىردەن ءوتتى، - دەپ جازعان وداق وكىلى جەلىدەگى پاراقشاسىنا.
ول الاماندا الدىنا جان سالماي شاپقان داۋىلپاز اقىننىڭ دۇنيەدەن وتۋىنە وراي بۇكىل قازاق حالقىنا، ونىڭ وقىرماندارىنا قاتتى قايعىرىپ، كوڭىل ايتقان.
ايتا كەتەيىك، تەمىرحان مەدەتبەك 1945-جىلى 6-ناۋرىزدا تۇركىستان وبلىسىندا دۇنيەگە كەلگەن.
اباي اتىنداعى قازاق مەملەكەتتىك پەداگوگيكا ينستيتۋتى (قازىرگى ۇلتتىق پەداگوگيكا ۋنيۆەرسيتەتى) فيلولوگيا فاكۋلتەتىندە وقىعان. 1968-2002-جىلدارى راديو مەن تەلەۆيدەنيەدە، ءارتۇرلى گازەت-جۋرنالدا، شىعارماشىلىق ۇيىمداردا قىزمەت اتقارعان. قازاقستان جازۋشىلار وداعىندا ەكىنشى حاتشى بولدى، 2003-جىلدان «اقيقات» جۋرنالىنىڭ باس رەداكتورى.
العاشقى جىر جيناعى «جانىمنىڭ جاس قۇراعى» دەگەن اتپەن 1970-جىلى جارىق كوردى. وننان استام ولەڭ جيناقتارى جاريالانىپ، وقىرماندار مەن سىنشىلاردىڭ جوعارى باعاسىن الدى.
«اباي الەمى» (1995) جانە «بابا ءداستۇردىڭ مۇراگەرى كىم: تۋعان ادەبيەت تۋرالى ويلار» (2001) اتتى ادەبي-سىن ەڭبەكتەرىندە قالامگەر اباي الەمىنىڭ پوەتيكالىق تەرەڭدىگىن، قازاق مادەنيەتىنىڭ دامۋ سيپاتىن سارالاپ، اقىندىق پسيحولوگيانىڭ ىشكى بولمىسىنا باعا بەردى.
قازاق پوەزياسىنىڭ تۇركىلەر كەزەڭىنەن قالىپتاسقان رومانتيكالىق-رەاليستىك ءورشىل سارىنىن وزىندىك كوركەمدىك شەشىم اياسىندا جاڭاشىل تۋىندىلارىمەن بايىتتى.
«كوك تۇرىكتەر سارىنى» اتتى جيناعىندا (2002) زامانا زارى مەن بۇگىنگى كۇن ماسەلەلەرى ەجەلگى تۇركى جىرلارى ۇلگىسىندە ايتىلعان، اقىن كونە تۇرگە جاڭا مازمۇن سىيدىرعان.
ەسكە سالايىق، بۇعان دەيىن مايدانگەر اقىن ءابۋ سارسەنبايەۆتىڭ «سەن قۇرمەتتە ونى» ولەڭى كىمگە ارنالعانىن جازدىق.
