قازاقستاننىڭ اقپاراتتىق قاۋىپسىزدىگىن قامتاماسىز ەتەتىن ۇلتتىق ينستيتۋت وزگەرەدى
استانا. KAZINFORM - سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى قازاقستاننىڭ اقپاراتتىق قاۋىپسىزدىگىن قامتاماسىز ەتۋ فۋنكتسياسىن باسقا ۇيىمعا بەرمەكشى.
«ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ «سيفرلىق ۇكىمەتى قولداۋ ورتالىعى» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنى اقپاراتتىق قاۋىپسىزدىكتى قامتاماسىز ەتۋ سالاسىنداعى ۇلتتىق دامۋ ينستيتۋتى بولىپ بەلگىلەنسىن»، - دەپ جازىلعان ۇكىمەت قاۋلىسىنىڭ جوباسىندا.
ايتا كەتۋ كەرەك، بۇل فۋنكتسيانى قازىر عىلىم جانە جوعارى ءبىلىم مينيسترلىگىنىڭ «اقپاراتتىق جانە ەسەپتەۋ تەحنولوگيالارى ينستيتۋتى» ر م ك اتقارىپ وتىر.
«2018 -جىلدان باستاپ سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى ينستيتۋت جۇرگىزىپ جاتقان جۇمىس تۋرالى حاباردار ەتىلمەگەن، ينستيتۋتتى جەدەل باسقارۋ، جۇمىستىڭ باسىم باعىتتارى مەن مىندەتتى كولەمىن ايقىنداۋ مۇمكىندىگى جوق. بۇل جاعداي اقپاراتتىق قاۋىپسىزدىك سالاسىنداعى مەملەكەتتىك ساياساتتى ىسكە اسىرۋعا، ونى دامىتۋعا جانە جۇكتەلگەن فۋنكتسيالاردى ءتيىمدى ورىنداۋعا تەرىس اسەر ەتەدى»، - دەپ جازىلعان قاۋلى جوباسىنداعى نەگىزدەمەدە.
ايتا كەتۋ كەرەك، سدياوم الدىندا اقپاراتتىق قاۋىپسىزدىكتى قامتاماسىز ەتۋ، ونىڭ ىشىندە بايلانىس جەلىلەرىندەگى قاۋىپسىزدىكتى كۇشەيتۋ، قورعالعان موبيلدى جەلىنى قۇرۋ جانە ت. ب. بويىنشا ءبىرقاتار مىندەت تۇر.
مينيسترلىكتەگىلەر بۇل وزگەرىس سالاداعى ءوزارا ءىس- قيمىل مەن جۇمىستىڭ ناتيجەلىلىگىن ارتتىرىپ، اقپاراتتىق قاۋىپسىزدىكتى دامىتۋ ماسەلەلەرىندەگى تاسىلدەردى دايەكتى ەتە تۇسەدى.
«مۇنداي فۋنكتسيالاردى سدياوم-گە باعىنىستى ۇيىمعا بەرۋ اقپاراتتىق- كوممۋنيكاتسيالىق تەحنولوگيالاردىڭ ارالاس سالاسىنىڭ تابىستى جانە سينەرگەتيكالىق دامۋىمەن نەگىزدەلەدى»، - دەلىنگەن قۇجاتتا.
قاۋلى جوباسى 18-قاراشاعا دەيىن اشىق تالقىلاۋدا بولادى.
بۇعان دەيىن سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ قازاقستان نەگە +7 كودىن رەسەي فەدەراتسياسىمەن قوساقتاسىپ قولدانۋدان ءالى كۇنگە باس تارتپاي كەلە جاتقانىن ايتقان ەدى.
