قازاقستاننىڭ 426 ەلدى مەكەنىندە سۋ تاپشىلىعى ماسەلەسى شەشىمىن تابادى

استانا. قازاقپارات - 2030 -جىلعا دەيىن سۋ سالاسىن دامىتۋ جونىندەگى كەشەندى جوسپار جۇزەگە اسسا، سۋ رەسۋرستارىن باسقارۋ تۇجىرىمداماسى، سۋ ۇنەمدەۋ جونىندەگى جول كارتاسى، سونداي-اق جاڭا سۋ كودەكسىن ازىرلەۋ ءارى ىسكە اسىرۋ ماسەلەسى قارالىستىرلعان. بۇل تۋرالى ۇكىمەت ءمالىم ەتتى.

سۋ سالاسىنداعى نەگىزگى پروبلەمالاردى - مىسالى، اۋىز سۋ مەن سۋارمالى سۋدىڭ جەتىسپەۋشىلىگىن، سونداي-اق ءجيى بولاتىن سۋ تاسقىنىن ءتيىمدى شەشۋ ءۇشىن ۇكىمەت شارالار كەشەنىن قابىلداۋدا. ولاردىڭ قاتارىندا 2030 -جىلعا دەيىن سۋ سالاسىن دامىتۋ جونىندەگى كەشەندى جوسپاردى، 2024-2030 -جىلدارعا ارنالعان سۋ رەسۋرستارىن باسقارۋ تۇجىرىمداماسىن، سۋ ۇنەمدەۋ جونىندەگى جول كارتاسىن، سونداي-اق جاڭا سۋ كودەكسىن ازىرلەۋ جانە ىسكە اسىرۋ بار. بۇل باستامالار جاعدايدى جۇيەلى تۇردە جاقسارتۋعا باعىتتالعان جانە جاقىن ارادا ايتارلىقتاي وڭ ناتيجەلەر تۋرالى ايتۋعا نەگىز بەرەدى.

ەڭ الدىمەن، حالىقتى اۋىز سۋمەن قامتاماسىز ەتۋگە قاتىستى ماسەلە ۇزاق ۋاقىت بويى شيەلەنىستى بولىپ كەلدى، اسىرەسە اۋىلدىق جەرلەردە تۇرعىندار ساپالى ءارى تۇراقتى سۋمەن قامتاماسىز ەتۋدىڭ جەتىسپەۋشىلىگىنە تاپ بولدى. دەگەنمەن، 426 ەلدى مەكەندى جانە ميلليوننان استام ادامدى قامتيتىن 28 ينفراقۇرىلىمدىق جوبانى جۇزەگە اسىرۋدىڭ ارقاسىندا جاعداي ايتارلىقتاي جاقسارادى دەپ كۇتىلۋدە. بۇدان باسقا، اقتوبە وبلىسىنداعى «كوكجيدە» كەن ورنى سياقتى جەراستى كوزدەرىن دامىتۋ تاۋلىگىنە قوسىمشا 173,4 مىڭ م3 سۋمەن قامتاماسىز ەتۋگە مۇمكىندىك بەرەدى.

- ەگىستىكتەردى سۋارۋ ماسەلەسىنە كەلەتىن بولساق، وسىعان دەيىن اۋىل شارۋاشىلىعىن سۋمەن قامتاماسىز ەتۋ تۇراقتى جۇرگىزىلمەي قالعانىن جانە توزعان سۋارۋ جەلىلەرىندەگى شىعىندار ايتارلىقتاي كولەمگە جەتكەنىن اتاپ وتكەن ءجون. الايدا جاعداي تۇبەگەيلى وزگەرۋدە: 20 جاڭا سۋ قويماسىن سالۋ جانە 15 قولدانىستاعى سۋ قويماسىن قالپىنا كەلتىرۋ، سونداي-اق 14 مىڭ شاقىرىمنان استام سۋارۋ كانالدارىن رەكونسترۋكتسيالاۋ كوزدەلگەن. سونىمەن بىرگە سۋ ۇنەمدەۋدىڭ زاماناۋي ادىستەرى، سونىڭ ىشىندە سۋ ۇنەمدەۋ تەحنولوگيالارىن ەنگىزۋدى سۋبسيديالاۋ ەنگىزىلمەك، بۇل قىزمەتتەردىڭ قۇنىن ايتارلىقتاي تومەندەتۋگە اكەلەدى، - دەلىنگەن حابارلامادا.

وسىلايشا، ءونىمسىز شىعىنداردى ازايتۋ ارقىلى اگرارلىق سەكتور بىرتىندەپ ۇزاق ۋاقىت بويعى سۋ تاپشىلىعى جاعدايىنان شىعىپ، تۇراقتى ءارى ۇنەمدى سۋمەن قامتاماسىز ەتۋگە كوشەدى.

سايىپ كەلگەندە، سۋ تاسقىنىنىڭ الدىن الۋ سالاسىندا دا تۇبەگەيلى قادامدار جاسالۋدا. ەگەر بۇرىن ءاربىر سۋ تاسقىنى ماۋسىمى مۇلىك پەن اۋىل شارۋاشىلىعىنا زالال اكەلەتىن بولسا، ءقازىر كوكتەمگى سۋلاردى جيناقتاۋ ءۇشىن جالپى سىيىمدىلىعى 180 ميلليون م3 دەيىنگى سۋ قويمالارى سالىنىپ جاتىر.

سونىمەن قاتار جاڭا نورماتيۆتىك اكتىلەر سۋ تاسقىنىن باسقارۋدىڭ جۇيەلى ءتاسىلىن كوزدەيدى، وندا سۋ تاسقىنىنىڭ ەداۋىر كولەمى سۋ جايىلمالارىنا، كولدەرگە جانە جايىلىمدارعا جىبەرىلەدى، وسىلايشا ەكوجۇيەلەردى قولدايدى جانە شولەيتتەنۋدىڭ الدىن الادى. سونداي-اق ەلدى مەكەندەردى سۋ تاسقىنىنان قورعاۋ ءۇشىن ينجەنەرلىك قۇرىلىستار سالۋدى مىندەتتەيتىن نورمالار كوزدەلگەن. وسىنىڭ ارقاسىندا قازاقستان سالدارلارمەن رەاكتيۆتى كۇرەستەن سۋ تاسقىنى تاۋەكەلدەرىن بەلسەندى باسقارۋعا دايەكتى تۇردە كوشىپ جاتىر.

وسىلايشا، مەملەكەت باسشىسىنىڭ تاپسىرمالارىن دايەكتى جۇزەگە اسىرۋ ناتيجەسىندە سۋ رەسۋرستارىن باسقارۋدىڭ تۇراقتى جۇيەسى قالىپتاسپاق.