قازاقستاننان شىققان گۋمانيتارلىق رەيس اۋعانستاننىڭ گەرات ايماعىنا قوندى
قازاقستان حالقىنىڭ اتىنان اۋعانستاننىڭ باتىسىنداعى ءزىلزالادان زارداپ شەككەن حالىققا گۋمانيتارلىق كومەكتىڭ العاشقى لەگىن اكەلگەن ارنايى ۇشاق گەرات اۋەجايىنا قوندى، دەپ حابارلايدى Kazinform ءتىلشىسى ەسىمجان ناقتىباي.

گۋمانيتارلىق جۇكتى اۋعانستان ازاماتتىق اۋەجايلار دەپارتامەنتىنىڭ باس ديرەكتورى - ءزىلزالا سالدارىمەن كۇرەس شتابىنىڭ مۇشەسى گاۆرال ابدۋل سالتانات باستاعان توپ قابىلداپ الدى. شتاب مۇشەسى قازاقستان يران مەن تۇركيادان كەيىن ءۇشىنشى بولىپ كومەك جەتكىزگەنىن ايتادى.

«بىرىنشىدەن، وسىناۋ قيىن كۇندە كومەك قولىن سوعان دوس پەيىلدى قازاقستاننىڭ حالقىنا، پرەزيدەنت قاسىم-جومارت توقايەۆ مىرزاعا العىس ايتامىز. جۇكتى قابىلداپ العاننان كەيىن ارنايى كوميسسيا ونى قايدا جونەلتەتىنىن كەڭەسىپ شەشەدى. قازىر قايتىس بولعان ادامداردى جەرلەپ، زارداپ شەككەندەرگە العاشقى كومەك كورسەتىپ ۇلگەردىك. تاعى زارداپ شەككەندەر انىقتالسا، وعان دا دايىن وتىرمىز. ويتكەنى، بۇگىن ساعات 5.00 كەزىندە قازاقستاندىق قۇتقارۋشىلار جۇمىس ىستەپ جاتقان اۋماقتا تاعى جەر سىلكىندى. تاعى دا قازاقستان حالقىنا وسىنداي قيىن كەزدە كومەك جىبەرىپ جاتقانى ءۇشىن راحمەت ايتامىز»، - دەيدى شتاب وكىلى.
بۇعان دەيىن حابارلاعانىمىزداي، ۇلتتىق ۇلاننىڭ Y8F200W ۇشاعىنا استانا، الماتى، شىمكەنت قالالارىنان 1200 ادام پانالايتىن 70 شاتىر، جالپى سالماعى 6 توننادان اساتىن ءدارى-دارمەك تيەلدى. بۇل ءدارى- دارمەكتىڭ ءتىزىمى اۋعانستان تاراپى سۇراتقان تىزبە بويىنشا جاساقتالعان. اتاپ ايتقاندا، ازيتروميتسين، يبۋپروفەن، سەفتازيديم، پاراتسەتامول سياقتى ىستىق تۇسىرەتىن، قابىنۋعا قارسى پرەپاراتتار مەن انتيبيوتيكتەر جەتكىزىلدى.

ءزىلزالا سالدارىمەن كۇرەس شتابىنىڭ وكىلى گارۆال ابدۋل سالتانات گەرات پروۆينتسياسىنداعى ءزىلزالا كەزىندە قيراندىعا اينالعان 13 ەلدى مەكەننىڭ تۇرعىندارىنا ءالى دە شاتىرلار مەن مەديتسينالىق بۇيىمدار، ءدارى- دارمەك وتە قاجەت ەكەنىن ايتادى.
ەسكە سالساق، 7-قازان كۇنى اۋعانستاننىڭ باتىسىنداعى گەرات پروۆينتسياسىنداعى 6,3 بالدىق جەر سىلكىنىسىنەن 2053 ادام قازا تاۋىپ، 9 مىڭنان استام ادام جاراقات العان.

بۇعان دەيىن قازاقستاننىڭ اۋعانستانعا گۋمانيتارلىق كومەك كورسەتەتىنى حابارلانعان ەدى.
ۇلتتىق ۇلاننىڭ ارنايى بورتىنا 16 توننا گۋمانيتارلىق جۇك تيەلىپ اۋعانستانعا ۇشۋعا دايىن تۇرعانىن حابارلاعانبىز. جۇكتىڭ ءبىر بولىگى اۋە كولىگى ارقىلى جەتكىزىلسە، ءبىر بولىگى تەمىرجول كولىگىمەن جونەلتىلەدى.
سونىمەن قاتار اۋعانستانعا ءۇيىندى استىندا قالعان ادامداردى قۇتقارۋ ءۇشىن ت ج م قۇتقارۋشىلارى، سونىڭ ىشىندە كينولوگ ماماندار جىبەرىلەدى.
سىرتقى ىستەر مينيسترلىگىنىڭ رەسمي وكىلى ايبەك سمادياروۆتىڭ ايتۋىنشا، اۋعانستانداعى جەر سىلكىنىسىنەن قازاقستان ازاماتتارى زارداپ شەككەن جوق.
اۆتور
ەسىمجان ناقتىباي