قازاقستاندىقتاردىڭ 9,3 پايىزىندا جالعىز جاقىن دوسى بار - ساۋالناما
استانا. KAZINFORM - ق ر پرەزيدەنتى جانىنداعى ستراتەگيالىق زەرتتەۋلەر ورتالىعىنىڭ باس عىلىمي قىزمەتكەرى، الەۋمەتتانۋ عىلىمدارىنىڭ دوكتورى ايگۇل زابيروۆا «قازاقستاندىقتاردىڭ دوستىق بايلانىستارى قانشالىقتى بەرىك» دەگەن سۇراققا جاۋاپ ىزدەگەن ساۋالنامانىڭ قورىتىندىسىن جاريالادى.
ءسىز تىعىز قارىم-قاتىناس جاسايتىن جانە ءوزىڭىز ءۇشىن ماڭىزدى ماسەلەلەر تۋرالى اشىق سويلەسە الاتىن قانشا دوسىڭىز بار؟ ساۋالناماعا تارتىلعان ادامدارعا اۋەلى وسىنداي سۇراق قويىلعان.
رەسپوندەنتتەردىڭ %68,5 ى 2 دەن 9 عا دەيىن دوسى بار ەكەنىن ايتقان.
- بۇل - دوستىق بايلانىستاردىڭ جەتكىلىكتى كەڭ ءارى بەلسەندى ەكەنىن كورسەتەدى، - دەپ جازادى عالىم.
بۇلاردىڭ ىشىندە %31,6 رەسپوندەنت 3-4 جاقىن دوسى بار ەكەنىن ءمالىم ەتكەن. ال %35,2 رەسپوندەنت جاقىن ارالاساتىن دوسىنىڭ سانى 5-تەن اساتىنىن كورسەتكەن.
- 10 نان كوپ دوسى بار رەسپوندەنتتەر كوبىنەسە تۇركىستان، قىزىلوردا جانە اتىراۋ وبلىستارىنان. 5 پەن 9 ارالىعىندا دوسى بار رەسپوندەنتتەردىڭ باسىم بولىگى استانا، قىزىلوردا جانە اقتوبە وبلىستارىندا ءجيى كەزدەسەدى، — دەيدى زەرتتەۋشى.
رەسپوندەنتتەردىڭ %5,7 ى مۇلدە جاقىن دوسى جوق ەكەنىن ايتسا، تاعى %9,3 ى جالعىز دوس بار ەكەنىن مالىمدەگەن.
- بۇل - الاڭداتارلىق، ءبىراق دابىل قاعارلىق دەڭگەي ەمەس. مىسالى، ا ق ش نەمەسە جاپونيا سەكىلدى ەلدەردە جالعىزدىق جاعدايى الدەقايدا ءجيى كەزدەسەدى. دەگەنمەن، 0-1 عانا جاقىن دوسى بار %15 رەسپوندەنتتىڭ بولۋى الەۋمەتتىك وقشاۋلانۋ، ءالسىز الەۋمەتتىك بىرىگۋ نەمەسە الەۋمەتتىك بايلانىستاردىڭ ءۇزىلۋى سياقتى ۇردىستەردىڭ بار ەكەنىن كورسەتەدى. بۇل اسىرەسە وسال توپتار - ەگدە جاستاعىلار، ميگرانتتار مەن جۇمىسسىزدار اراسىندا وزەكتى. جەتىسۋ، الماتى جانە جامبىل وبلىستارىنىڭ تۇرعىندارى كوبىنە ءبىر عانا دوسى بار ەكەنىن كورسەتكەن. ال مۇلدە دوسى جوق رەسپوندەنتتەر كوبىنە جەتىسۋ، شىعىس قازاقستان جانە قاراعاندى وبلىستارىندا كەزدەسەدى، - دەيدى ايگۇل زابيروۆا.
سۇرالعانداردىڭ شامامەن ۇشتەن ءبىرى (%28,9) 3-4 دوسىمەن ايىنا كەمىندە ءبىر رەت كەزدەسەدى (شىمكەنت، اقمولا جانە پاۆلودار وبلىستارىنىڭ تۇرعىندارى). ال %20,1 رەسپوندەنت ايىنا كەمىندە ءبىر رەت 5-9 دوسىمەن كەزدەسەدى (شىمكەنت، قىزىلوردا، پاۆلودار، اقتوبە، اباي جانە باتىس قازاقستان وبلىستارىنىڭ تۇرعىندارى).
سۇرالعانداردىڭ %15 ى 5-9 دوسىنىڭ قولداۋىنا سەنىم ارتسا (شىمكەنت، ماڭعىستاۋ جانە اتىراۋ وبلىستارىنىڭ تۇرعىندارى)، %14 ى 10 جانە ودان كوپ دوسىنان قولداۋ سەزىنەتىنىن ايتقان.
رەسپوندەنتتەردىڭ %31 ى 3-4 دوسىنان كومەك سۇراي الاتىنىن، (كوبىنەسە بۇل شىمكەنت، استانا جانە الماتى قالالارىنىڭ تۇرعىندارى)، %20 ى كومەك سۇراپ جۇگىنەتىن ەكى-اق دوسى بار ەكەنىن كورسەتكەن (قاراعاندى، قوستاناي، شىعىس قازاقستان وبلىستارى مەن استانا قالاسى)، %11 ى سەنىم ارتاتىن جالعىز دوسى بار ەكەنىن مويىنداعان (كوبىنەسە قاراعاندى، سولتۇستىك قازاقستان، اقمولا، جامبىل، اباي جانە جەتىسۋ وبلىستارىنىڭ تۇرعىندارى. سونداي-اق، %8,7 رەسپوندەنت كومەك سۇراي الاتىن ءبىر دە ءبىر دوسى جوق ەكەنىن راستاعان (جالعىزدىقتى ەڭ كوپ سەزىنەتىندەر - جەتىسۋ، ۇلىتاۋ، قاراعاندى جانە اقتوبە وبلىستارىنىڭ تۇرعىندارى).
اۆتور
ەسىمجان ناقتىباي
