قازاقستاندىقتار «ۆيفا» تايفۋنىنا قاراماستان ۆەتنامعا ساپار شەگىپ جاتىر

استانا. KAZINFORM - قازىر بۇل ەلدە 8 مىڭعا جۋىق وتانداسىمىز ءجۇر، دەپ حابارلايدى Kazinform.

بۇل ەلدە قولايسىز اۋا رايىنان عيماراتتارعا زاقىم كەلىپ، تۇرعىندار زارداپ شەگىپ، ادام ءولىمى تىركەلگەن. سولتۇستىكتەگى اۋەجايلار جابىلىپ، 100 دەن استام رەيس، سونىڭ ىشىندە ىشكى رەيستەر دە توقتاتىلدى.

ۆەتنام پرەمەر-ءمينيسترى فام مين ترينح قاۋىپتى ايماقتاردان حالىقتى شۇعىل ەۆاكۋاتسيالاۋدى، جۇك تاسىمالداۋدى توقتاتۋدى جانە ماڭىزدى ينفراقۇرىلىمدى قورعاۋدى تاپسىردى.

قازاقستاندىق تۋريستەردىڭ مالىمەتىنشە، تانىمال فۋ-كۋوك، نحا-چانگ جانە دانانگ كۋرورتتارى ورنالاسقان ەلدىڭ وڭتۇستىگىندە جاعداي تىنىش.

- وڭتۇستىكتەگى قالالاردا دەمالىپ جاتقاندارعا قاۋىپ تونگەن جوق. اۋا-رايى وزگەرسە دە، جاعداي ءبىرقالىپتى. بيلىك مۇنداي جاعدايلارعا تىڭعىلىقتى دايىندالعان. ءبىراق سولتۇستىكتە تۋريستەرگە تەڭىزگە شىعۋعا تىيىم سالىندى، - دەيدى دانيار نۇرسەيىتوۆ.

قازىر ۆەتنامدا 8 مىڭعا جۋىق قازاقستاندىق تۋريست بار ەكەنى حابارلاندى. تايفۋن سولتۇستىكتە تاعى 2-3 كۇن ساقتالادى دەپ كۇتىلىپ وتىر.

وسىعان دەيىن پرەزيدەنت ۆەتنامدا بولعان «ۆيفا» تايفۋنىنان كوپتەگەن ادامنىڭ قازا تاپقانى جانە زارداپ شەككەنى تۋرالى حاباردى تەرەڭ كۇيزەلىسپەن قابىلداعانىن، ۆەتنام كوممۋنيستىك پارتياسى ورتالىق كوميتەتىنىڭ باس حاتشىسىنا كوڭىل ايتقانىن جازعان بولاتىنبىز.