قازاقستاندىقتار قىتايلىق كولىكتەردەن باس تارتا باستادى

ەلدە ءار ونىنشى كولىككە شاعىم تۇسەدى. سوڭعى جىلدارى قازاقستاندا قىتايلىق اۆتوكولىكتەردىڭ ساتىلىمى قارقىندى وسۋدە. ءبىراق ولاردىڭ ساپاسىنا قاتىستى شاعىمدار دا ارتىپ كەلەدى. 2024 -جىلى تۇتىنۋشىلاردىڭ قۇقىقتارىن قورعاۋ كوميتەتىنە قىتايدان اكەلىنگەن اۆتوكولىكتەرگە قاتىستى 57 شاعىم تۇسكەن. بۇل - ەلدەگى بارلىق اۆتوكولىككە بايلانىستى شاعىمداردىڭ شامامەن %10-نا تەڭ. Finratings.kz سايتى وسىلاي جازادى.

قىتايلىق كولىكتەردەگى نەگىزگى اقاۋلار
اۆتوكولىك يەلەرى تومەندەگىدەي اقاۋلارعا ءجيى شاعىمدانادى:

قوزعالتقىشتىڭ تۇراقسىز جۇمىسى؛

بەرىلىس قورابىنىڭ ىستەن شىعۋى؛

سالقىنداتۋ جۇيەسىنىڭ ءتيىمدى جۇمىس ىستەمەۋى؛

ەلەكترونيكاداعى اقاۋلار.

كەيبىر جۇرگىزۋشىلەر كولىكتەرىن اۆتوسالوندارعا قايتارا العان، ال باسقالارى جوندەۋ نەمەسە قوسالقى بولشەكتەردى تەگىن اۋىستىرۋ مۇمكىندىگىنە يە بولدى. ءبىراق كوپتەگەن ماسەلەنى شەشۋ ۇزاق ۋاقىت الادى.

قاي وڭىردە شاعىم كوپ؟
شاعىمداردىڭ باسىم بولىگى الماتى (9 ءوتىنىش) جانە استانا (6 ءوتىنىش) قالالارىنان تۇسكەن. ءبىراق بۇل پروبلەما قازاقستاننىڭ بارلىق دەرلىك وڭىرىندە كەزدەسەدى.

قوستاناي وبلىسى - 7 شاعىم تىركەلگەن، يەلەر اۆتوتەحنيكالىق ساراپتاما مەن وتەماقى تالاپ ەتۋدە.

اتىراۋ، شىعىس قازاقستان جانە پاۆلودار وبلىستارى - تەكسەرۋلەر جۇرگىزىلدى، ءبىر جاعدايدا سوت 11 ميلليون تەڭگە تولەۋگە شەشىم شىعاردى.

شىمكەنت - شاعىمداردىڭ كوبى قارجى قايتارۋمەن اياقتالدى، ءبىراق ءبىر ءىس ءالى قارالۋدا.

اقتوبە وبلىسى - سوت شەشىمىمەن 16 ميلليون تەڭگەدەن استام وتەماقى تولەندى.

اقمولا وبلىسى - قوزعالتقىشتاردى اۋىستىرۋ تالاپ ەتىلۋدە، تالاپ سوماسى 9,99 ميلليون تەڭگەگە جەتتى.

اباي، جامبىل جانە قىزىلوردا وبلىستارىندا رەسمي شاعىمدار تىركەلمەگەنىمەن، جۇرگىزۋشىلەر زاڭگەرلىك كەڭەس الىپ جاتىر. بۇل ايماقتا جاعداي الداعى ۋاقىتتا وزگەرۋى مۇمكىن.

قىتايلىق اۆتوكولىكتەر نەگە ءالى دە تانىمال؟
ساپا ماسەلەلەرىنە قاراماستان قىتايدان اكەلىنگەن كولىكتەر سۇرانىسقا يە بولىپ وتىر. نەگىزگى سەبەپتەرى:

قولجەتىمدى باعا؛

زاماناۋي جابدىقتالۋى؛

ديلەرلىك جەلىنىڭ كەڭەيۋى.

كولىك اقاۋى شىقسا نە ىستەۋ كەرەك؟
1. الدىمەن كولىكتى ساتىپ العان ديلەرگە جازباشا شاعىم ءتۇسىرۋ قاجەت. ساتۋشى 10 جۇمىس كۇنى ىشىندە جاۋاپ بەرۋگە مىندەتتى.

2. ەگەر جاۋاپ بولماسا نەمەسە شاعىم قابىلدانباسا، تۇتىنۋشىلاردىڭ قۇقىقتارىن قورعاۋ كوميتەتىنىڭ ايماقتىق بولىمشەسىنە نەمەسە «E-otinish» پورتالى ارقىلى شاعىمدانۋعا بولادى.

3. كۇردەلى جاعدايلاردا كوميتەت سوتقا شاعىم تۇسىرۋگە جانە تۇتىنۋشىنىڭ مۇددەسىن قورعاۋعا كومەكتەسە الادى.

ق ر ساۋدا جانە ينتەگراتسيا مينيسترلىگىنىڭ تۇتىنۋشىلاردىڭ قۇقىقتارىن قورعاۋ كوميتەتىنىڭ بايلانىس نومىرلەرى ولاردىڭ رەسمي سايتىندا قولجەتىمدى.