قازاقستاندىقتار لايىقتى ءومىر ءسۇرۋ ءۇشىن قانشا تابىس تابۋى كەرەك - مينيستر جاۋابى
استانا. KAZINFORM - ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا قازاقستاندىقتار جايلى ءارى لايىقتى ءومىر ءسۇرۋى ءۇشىن ساپالى جۇمىس ىستەۋى كەرەكتىگىن ايتتى.
«لايىقتى ءومىر ءسۇرۋ دەگەندە ءبىز ەڭبەك نارىعى تۇجىرىمداماسىنىڭ بەكىتىلگەنىن جانە قازاقستان جاڭا ساپالى جۇمىس ورىندارىن قۇرۋ جولىندا ەكەنىن ايتىپ وتىرمىز. ەلىمىزدە بار بولعانى 2 ميلليون 100 ساپالى جۇمىس ورنى بار، ەندى كورسەتكىشتى كەم دەگەندە 3 ميلليون 800 گە جەتكىزگەلى وتىرمىز. جالاقى ەڭ تومەنگى دەڭگەيدەن كەم بولماۋى كەرەك. الەۋمەتتىك كەپىلدىكتەر بولعان كەزدە، تۇراقتى جۇمىس بولسا، جالاقى ورتاشا كورسەتكىشتەن تومەن ەمەس، كەرىسىنشە ودان جوعارى بولۋى مۇمكىن جانە مىندەتتى تۇردە ەڭبەك قاۋىپسىزدىگى ساقتالعان جاعدايدا ول جۇمىس ساپالى دەپ سانالادى. جۇمىس بەرۋشىلەر وسى 4 كريتەريدى نازارعا الۋى ءتيىس. مەملەكەتتىك ينسپەكتور جۇمىستى تىكەلەي وسى كريتەريلەر بويىنشا باعالاۋدى قامتاماسىز ەتۋى كەرەك»، - دەپ جاۋاپ بەردى سۆەتلانا جاقىپوۆا ەلوردادا وتكەن «ەڭبەكتى قورعاۋ جانە ونەركاسىپتىك قاۋىپسىزدىك» اتتى حالىقارالىق كونفەرەنتسيا بارىسىندا ب ا ق وكىلدەرىنىڭ ساۋالىنا جاۋاپ بەرە وتىرىپ.
سونداي- اق، ب ا ق وكىلدەرى مينيستردەن «جايلى ءومىر ءسۇرۋ ءۇشىن تابىس ەڭ تومەنگى جالاقىدان جوعارى بولۋى كەرەك پە؟» دەپ ناقتىلادى.
«مىندەتتى تۇردە، ەڭ تومەنگى جالاقى - تومەن بىلىكتى ەڭبەك ءۇشىن ەڭبەكاقى تولەۋدى كوزدەيتىن ەڭ تومەنگى جالاقى ستاندارتى. بۇل دەگەنىمىز ادامنىڭ قۇزىرەتى، داعدىلارى مەن ءبىلىمى جوق»، - دەيدى ول.
