قازاقستاندىق زەينەتكەر 5 مىڭ شاقىرىمدى ۆەلوسيپەدپەن ءجۇرىپ ءوتىپ پاريجگە جەتتى

پاريج. KAZINFORM - تۋريزم جانە سپورت ءمينيسترى قازاقستاننىڭ پاريجدەگى ەلشىلىگىندە ۆەلوساياحاتشى ءراببىم بوراشەۆپەن كەزدەستى.

ۆەلوساياحاتشىنىڭ ساپارى فرانسياداعى «سالتاناتتى اركادا» (تريۋمفالنايا اركا) مارەسىنە جەتتى.

ونى فرانسياداعى قازاقستان ەلشىلىگىنىڭ ۇجىمى مەن فرانسۋز قوعام قايراتكەرلەرى سالتاناتتى تۇردە قارسى الدى.

ۆەدومستۆو باسشىسى ماڭعىستاۋ وبلىسىنىڭ تۇرعىنىن قازاقستان ەلشىلىگىندە قوشەمەتپەن قارسى الىپ، ۆەلوسيپەدشىنىڭ سپورتتىق دايىندىعى مەن ەرىك-جىگەرىن ەرەكشە اتاپ ءوتتى.

ول 5 مىڭ شاقىرىمنان استام قاشىقتىقتى ءجۇرىپ ءوتىپ، سپورتشىلارىمىزدى قولداۋ ءۇشىن وليمپ ويىندارىنا ارنايى كەلدى.

«وليمپياداعا بارۋ - ارماندارىمنىڭ ءبىرى ەدى. جاس كۇنىمدە ارمانىمدى جۇزەگە اسىرۋعا مۇمكىندىگىم بولمادى، الايدا بيىل سونىڭ ءساتى ءتۇسىپ تۇر ەكەن. جاڭبىرعا توتەپ بەرۋ، شەكارادان جانە قالا ارقىلى وتۋگە ۋاقىت پەن شىدام قاجەت، ءبىراق مەن ءوز دەگەنىمە جەتتىم»، - دەدى ءراببىم بوراشەۆ.

ۆەلوسيپەدشى الدىمەن اقتاۋدان باكۋگە، سودان كەيىن گرۋزيا ارقىلى ماۋسىمدا تۇركياعا جەتكەن.

ءارى قاراي ماجارستان، اۋستريا جانە گەرمانيا ارقىلى پاريجگە تابانى ءتيدى.

ءراببىم بوراشەۆ زەينەت جاسىنا دەيىن قۇرىلىس سالاسىندا جۇمىس ىستەگەن.

كەيىنگى جىلدارى ۆەلوسپورتپەن تۇراقتى اينالىسىپ، بىرنەشە رەت جارىستارعا دا قاتىسىپ ۇلگەرگەن.

بوراشەۆ ۆەلوشەرۋدى ۇيىمداستىرۋعا قولداۋ كورسەتىپ، كومەگىن اياماعان بارشا وتانداسىمىزعا العىسىن جەتكىزدى.