قازاقستاندىق زەينەتاقىسىنىڭ از ەسەپتەلگەنىن سوتتا دالەلدەپ، جەڭىپ شىقتى
KAZINFORM - ورال تۇرعىنى زەينەتاقى تولەمدەرىن قايتا ەسەپتەتىپ الدى. ول ءۇشىن سوتقا جۇگىنگەن. بۇل تۋرالى جوعارعى سوتتىڭ باسپا ءسوز قىزمەتى حابارلادى.
ەكى جىل بۇرىن 65 جاستاعى قازاقستاندىق زەينەتكە شىققان. وعان اي سايىنعى تولەم 2020-جىلدىڭ مامىرىنان 2023-جىلدىڭ ساۋىرىنە دەيىنگى كەزەڭدەگى ورتاشا ايلىق تابىس نەگىزىندە تاعايىندالعان.
كەيىننەن زەينەتكەر جۇمىس بەرۋشىسىنىڭ ءبىرىڭعاي جيناقتاۋشى زەينەتاقى قورىنا بىرنەشە اي بويى مىندەتتى زەينەتاقى جارنالارىن كەشىكتىرىپ اۋدارعانىن بىلگەن. وسىعان بايلانىستى ول زەينەتاقى مولشەرىن قايتا قاراۋ تۋرالى ءوتىنىش جاساعان. الايدا ۋاكىلەتتى ورگان وعان باس تارتقان. سەبەبى ەر ادام ءوزى ءتيىمدى دەپ ساناعان ءۇش جىلدىق كەزەڭدى تاڭداعان، سوندىقتان ءدال سول ۋاقىت ەسەپتەۋدىڭ نەگىزى رەتىندە قابىلدانعان.
- الايدا باستاپقى تاڭدالعان كەزەڭ بويىنشا جۇرگىزىلگەن ەسەپتەۋ زەينەتاقى جارنالارىن ازايتىپ كورسەتتى، بۇل جالپى تاعايىندالعان تولەم مولشەرىنە ەلەۋلى اسەر ەتتى. باس تارتۋمەن كەلىسپەگەن ازامات سوتقا جۇگىندى، - دەلىنگەن حابارلامادا.
ءبىرىنشى ساتىداعى سوت تالاپتى قاناعاتتاندىرىپ، ۋاكىلەتتى ورگاندى ءبىرقاتار سەبەپكە بايلانىستى تالاپكەردىڭ بۇزىلعان قۇقىقتارىن قالپىنا كەلتىرۋگە مىندەتتەدى.
- تالاپكەر 20 جىل بويى ۇزدىكسىز اۆتوكولىك كاسىپورنىندا جۇرگىزۋشى بولىپ جۇمىس ىستەگەن جانە تولىق كولەمدە جاسىنا بايلانىستى زەينەتاقى الۋعا قۇقىلى. جۇمىس بەرۋشىنىڭ زەينەتاقى جارنالارىن ۋاقىتىندا اۋدارماۋى ءوتىنىش بەرۋشىنىڭ قۇقىقتارىن شەكتەۋگە نەگىز بولماۋى ءتيىس. 2023-جىلى زەينەتاقى تاعايىندالعان ساتتە ۋاكىلەتتى ورگانعا ونىڭ ءساۋىر-تامىز 2023-جىلعى تابىسى مەن اۋدارىمدارى بەلگىلى بولعان. دەمەك، قايتا ەسەپتەۋدەن باس تارتۋ زەينەتكەردىڭ زاڭدى قۇقىقتارى مەن مۇددەلەرىن شەكتەيدى. ءوتىنىش بەرۋشى كورسەتكەن 2020-جىلدىڭ قىركۇيەگىنەن 2023-جىلدىڭ تامىزىنا دەيىنگى كەزەڭ زەينەتاقى مولشەرىن ەسەپتەۋ ءۇشىن ەڭ قولايلى بولىپ تابىلادى جانە ول ۋاكىلەتتى ورگان تاراپىنان ەسكەرىلۋگە ءتيىس ەدى، - دەپ ءتۇسىندىردى سوتتا.
اپەللياتسيالىق ساتى ءىستى قاراپ، ۋاكىلەتتى ورگان ءوتىنىشتى فورمالدى تۇردە قاراعانىن جانە تالاپكەردىڭ قۇقىقتارىن قورعاۋدى قامتاماسىز ەتپەي، زاڭ تالاپتارىن بۇزعانىن اتاپ ءوتتى.
باتىس قازاقستان وبلىستىق سوتى ءبىرىنشى ساتى سوتىنىڭ شەشىمىمەن كەلىستى. جوعارعى سوت تا سوت اكتىلەرىن وزگەرىسسىز قالدىردى.
