قازاقستاندىق وقۋشى پلاستيك قالدىقتارىنان ەكو- اسفالت ءوندىرۋ تەحنولوگياسىن ويلاپ تاپتى
استانا. KAZINFORM - اباي وبلىسى اياگوز قالاسىنداعى 10-مەكتەپ-گيمنازياسىنىڭ 10-سىنىپ وقۋشىسى ارۋجان قابدۋلماراتوۆا قايتا وڭدەلگەن پلاستيكتى پايدالانا وتىرىپ، «ەكو-اسفالت» تەحنولوگياسىن ازىرلەدى.
جاس عالىم جوبامەن 7-سىنىپتان باستاپ اينالىسىپ، بىرنەشە جىل بويىنا جۇيەلى تۇردە دامىتتى. ناتيجەسىندە تۇرمىستىق پلاستيك قالدىقتارىن قايتا وڭدەپ، ونى اسفالت قۇرامىنا قوسۋعا مۇمكىندىك بەرەتىن شەشىم ۇسىندى.
اسفالتقا پلاستيك قوسۋ ونىڭ بەرىكتىگىن ارتتىرىپ، پايدالانۋ مەرزىمىن ۇزارتادى. مۇنداي ءونىم ءوزىنىڭ پايدالانۋ سيپاتتامالارىن 12-18 جىلعا دەيىن، كەيدە 20-25 جىلعا دەيىن ساقتاي الادى. سونىمەن قاتار ءداستۇرلى تەحنولوگيالارمەن سالىستىرعاندا ءوندىرىس قۇنى تومەندەيدى.
وقۋ-اعارتۋ مينيسترلىگى مالىمەتىنشە، جوبادا قوسىمشا جول جابىنىنىڭ ساپاسىن باقىلاۋدى اۆتوماتتاندىرۋ دا قاراستىرىلعان. وقۋشى جول بويىنا اۆتونومدى روبوتتار جۇيەسىن ەنگىزۋدى دە ۇسىنادى. ونىڭ تۇجىرىمداماسى بويىنشا، «ا» روبوتى جول بەتىندەگى اقاۋلاردى انىقتاسا، «ۆ» روبوتى ولاردى جەدەل تۇردە جوندەيدى. بۇل ءتاسىل جوندەۋ شىعىندارىن ازايتۋعا مۇمكىندىك بەرەدى.
«ەكو-اسفالت» ازىرلەمەسى پلاستيك قالدىقتارىنىڭ كولەمىن ازايتۋعا جانە جول قۇرىلىسىنا زاماناۋي شەشىمدەردى ەنگىزۋگە باعىتتالعان.
ايتا كەتەيىك، ەلورداداعى 119-مەكتەپتىڭ 10-سىنىپ وقۋشىسى ايات تاجەن Raspberry Pi جيناعىن پايدالانا وتىرىپ، شاعىن كومپيۋتەر قۇراستىرىپ، باعدارلامالادى.
