قازاقستاندىق ونەرپازدار چولپون-اتاداعى «رۋح سانات» فەستيۆالىندە جۇلدەلى بولدى
استانا. KAZINFORM - قازاقستان ارتىستەرى «رۋح سانات» ءبىرىنشى دۇنيەجۇزىلىك ءداستۇرلى مادەنيەت جانە مۋزىكا فەستيۆالىندە اۋىزشا كاسىبي مۋزىكا ونەرى ورىنداۋشىلارىنىڭ حالىقارالىق بايقاۋىندا جەڭىسكە جەتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
1-2-تامىز كۇندەرى ىستىقكول جاعالاۋىندا وتكەن بايقاۋعا قازاقستان، وزبەكستان، رەسەي، جاپونيا، ءۇندىستان، مىسىر، وڭتۇستىك كورەيا، پولشا، بانگلادەش، گۆينەيا، ەستونيا، ماجارستان جانە نەپال ەلدەرىنەن 8 جەكە ورىنداۋشى مەن 12 شىعارماشىلىق توپ قاتىستى.
جەكە ورىنداۋشىلار اراسىندا 1-ورىن مەن 200 مىڭ سوم (شامامەن 1 ميلليون 242 مىڭ تەڭگە) جۇلدەنى قازاقستاندىق سالتانات قايرات قىزى مەن دونگاك نايدان (رەسەي) جەڭىپ الدى. شىعارماشىلىق توپتار اراسىندا ءبىرىنشى ورىندى «Tengri Saz» انسامبلى (قازاقستان) مەن «حارااچا» (رەسەي) انسامبلى ءبولىستى. جۇلدە 300 مىڭ سومدى (شامامەن 1 ميلليون 863 مىڭ تەڭگە) قۇرادى.
ءداستۇرلى مادەنيەت پەن مۋزىكانى ساقتاۋعا قوسقان ۇلەسى ءۇشىن حالىقارالىق قازىلار القاسىنىڭ ارنايى ديپلومىمەن «كاۋسار» توبى (قازاقستان)، «Klara Dudas and Borbala Toreky» (ماجارستان) ءدۋەتى جانە «Super Trio» (پولشا) ۇجىمى ماراپاتتالدى.
ۇيىمداستىرۋشىلار اتاپ وتكەندەي، بايقاۋ تاجىريبە الماسۋ مەن كاسىبي ءوسۋدىڭ جاندى الاڭعا، ماتەريالدىق ەمەس مادەني مۇرانى ساقتاۋعا ىقپال ەتەتىن مادەني ديالوگ الاڭىنا اينالدى.
«رۋح سانات» فەستيۆالى ەكى جىل سايىن وتەتىن تۇراقتى حالىقارالىق شارا بولماق. كەلەسى تاقىرىپ ەتنيكالىق بيگە ارنالادى.
اۆتور
زارينا تۋعانبايەۆا
