قازاقستاندىق تانىمال ءانشى بوقتىق ءسوز ايتقانى ءۇشىن قاماۋعا الىندى
استانا. KAZINFORM - قازاقستاندىق تانىمال ءانشى ءارى اكتريسا فارەما قازاقپايەۆا ۇساق بۇزاقىلىق جاساعانى ءۇشىن جاۋاپقا تارتىلدى، - دەپ حابارلايدى الماتى قالاسىنىڭ اكىمشىلىك قۇقىق بۇزۋشىلىق ىستەر جونىندەگى مامانداندىرىلعان اۋدانارالىق سوتى.
سوت 6-مامىردا Instagram-دا فارەما قازاقپايەۆانىڭ ۇياتسىز سوزدەر ايتقان ۆيدەو جاريالاعانىن انىقتادى. سوتتىڭ مالىمەتىنشە، ول وسىلايشا وزگەلەردى سىيلاماي، قوعامدىق ءتارتىپتى بۇزعان.
اكىمشىلىك قۇقىق بۇزۋشىلىق تۋرالى كودەكسىنىڭ 434-بابىنىڭ 1-بولىگىندە ۇساق بۇزاقىلىق جاساعانى ءۇشىن قازاقستاندىقتارعا 20 ا ە ك كولەمىندە ايىپپۇل سالىنادى نەمەسە 5 تاۋلىكتەن 15 تاۋلىككە دەيىنگى مەرزىمگە اكىمشىلىك قاماۋعا الىنادى دەپ كورسەتىلگەن.
سوت فارەما قازاقپايەۆانى كىنالى دەپ تاۋىپ، 7 تاۋلىككە قاماۋعا الۋ تۋرالى ۇكىم شىعاردى. قاۋلى زاڭدى كۇشىنە ەنگەن جوق.
فارەما قازاقپايەۆا Caffeine قىزدار توبىنىڭ قۇرامىندا ونەر كورسەتتى جانە «جاڭا جىلعا ءۇش كۇن قالعاندا» فيلمىندە باستى ءرولدى سومدادى.
