قازاقستاندىق «تالاق» فيلمى شانحاي حالىقارالىق كينوفەستيۆالىندە باس جۇلدەگە يە بولدى

بەيجىڭ. KAZINFORM - شانحايدا 22-ماۋسىمدا 26-حالىقارالىق شانحاي كينوفەستيۆالىنىڭ (SIFF) «التىن كۋبوگىمەن» ماراپاتتاۋ ءراسىمى ءوتتى.

ناتيجەسىندە «ۇزدىك فيلم» نوميناتسياسىن قازاقستاندىق «تالاق» فيلمى جەڭىپ السا، وسى كينودا باستى ءرولدى سومداعان اميرا وماروۆا ۇزدىك اكتريسا دەپ تانىلدى.

2024-جىلعى كينوفەستيۆالدىڭ نەگىزگى كونكۋرستىق باعدارلاماسىنا ەكى قازاقستاندىق فيلم كىردى: تولىقمەتراجدى كوركەم فيلمدەر بولىمىنە رەجيسسەر دانيار سالاماتتىڭ «تالاق» فيلمى تاڭدالدى. فيلمنىڭ شانحاي كينوفەستيۆالىندە الەمدىك پرەمەراسى بولدى.

«جاڭا ازيا تالانتتارى» باعدارلاماسىندا قازاقستان، رەسەي جانە يتاليا بىرلەسىپ تۇسىرگەن ماليكا ماحامەدجاننىڭ «ءبىر كۇننەن دە كوپ» اتتى تاعى ءبىر فيلمى كورسەتىلدى. ول سونىمەن قاتار الەمدىك پرەمەراعا اينالدى.

بايقاۋعا 105 ەل مەن ايماقتان 3,7 مىڭنان استام ءوتىنىم ءتۇستى. ىرىكتەۋ پروتسەسىنىڭ قورىتىندىسى بويىنشا 29 ەل مەن ايماقتان 50 فيلم بەس نوميناتسيا بويىنشا «التىن كۋبوك» جۇلدەسىن الۋ ءۇشىن تاڭدالدى، ونىڭ 38 ءى الەمدىك پرەمەرا بولدى.

«تولىق مەتراجدى كوركەم فيلمدەر» اتالىمى بويىنشا باس جۇلدەگە 14 فيلم، ونىڭ ىشىندە قازاقستاندىق «تالاق» فيلمى دە باق سىنادى.

شانحاي حالىقارالىق كينوفەستيۆالى 1993-جىلدان بەرى وتكىزىلىپ كەلەدى.