قازاقستاندىق جولشىلار كانادالىق ارىپتەستەرىنىڭ تاجىريبەسىن زەرتتەيدى
استانا. KAZINFORM - كولىك ءمينيسترى مارات قارابايەۆتىڭ كانادانىڭ مونرەال قالاسىنا جۇمىس ساپارى بارىسىندا ح ا ا ۇ-نىڭ 14-شى اەروناۆيگاتسيالىق كونفەرەنتسياسى (AN- Conf/14) اياسىندا كانادا كولىك ءمينيسترىنىڭ ورىنباسارى ارۋن تانگارادجبەن كەزدەسۋى ءوتتى.
كەزدەسۋ بارىسىندا تاراپتار اۆتوجول قۇرىلىسى بويىنشا تاجىريبەمەن الماسۋ ماقساتىندا قازاقستاندىق جولشىلاردىڭ كاناداعا ساپارىن ۇيىمداستىرۋعا كەلىستى. سونداي-اق كانادانىڭ كولىك مينيسترلىگىنىڭ باسشىلىعىمەن ەكى ەل اراسىندا تىكەلەي اۋە قاتىناسىن اشۋدىڭ قۇقىقتىق نەگىزدەرىن قۇرۋ تۋرالى كەلىسىمگە قول جەتكىزدى.
ساپار اياسىندا كانادالىق DeHavilland جانە Bombardier اۋە كەمەلەرىن شىعاراتىن كومپانيالاردىڭ باسشىلىعىمەن شاعىن اۆياتسيانى دامىتۋ تۋرالى ىنتىماقتاستىق ماسەلەلەرى تالقىلاندى.
سونىمەن قاتار «NDT Technologies Inc» كومپانياسىنىڭ توراعاسىمەن كەزدەسۋ ءوتتى. قوس تاراپ تەمىرجول كولىگى سالاسىنداعى ىنتىماقتاستىق ماسەلەسىن پىسىقتاۋعا كەلىستى.
انىقتاما ءۇشىن: «NDT Technologies Inc» سيفرلىق وپتيكا، ۋلترادىبىستىق، ەلەكتروماگنيتتىك جانە لازەرلىك باقىلاۋ تەحنولوگيالارىن پايدالاناتىن اۆتوماتتاندىرىلعان جۇيەلەردى جوبالاۋ، ورناتۋ جانە تەحنيكالىق قىزمەت كورسەتۋمەن اينالىساتىن ينتەگراتسيالانعان اۆتوماتتاندىرىلعان بۇزۋشىلىقتى باقىلاۋ (ب ب) جانە ولشەۋ جۇيەلەرىنىڭ جەتكىزۋشىسى سانالادى.
