قازاقستاندىق ءانشى «Singer» بايقاۋىندا ونەر كورسەتتى

استانا. KAZINFORM - قازاقستاندىق ءانشى رۋحيا بايدۇكەن قىتايداعى «Singer» ءان بايقاۋىندا ونەر كورسەتتى.

رۋحيا 8-كەزەڭدە «All By Myself» ءانىن شىرقادى.

بۇعان دەيىن حابارلاعانىمىزداي، «توپ جارۋ» ستاتۋسىمەن كەلگەن شەتەلدىك انشىگە قويىلعان تالاپ بويىنشا، رۋحيا الدىڭعى 7-كەزەڭدە ۇزدىك 4 كە ەنگەن انشىلەردىڭ ءبىرىن تاڭداپ، ونىمەن جەكپە-جەك سايىسقا ءتۇستى.

وكىنىشكە وراي، قازاقستاندىق ءانشى داۋىس بەرۋ ناتيجەسىندە جەڭىسكە جەتە المادى.

بايقاۋدىڭ 8-كەزەڭى اياقتالعاننان كەيىن، كوپتەگەن قىتايلىق كورەرمەن Weibo الەۋمەتتىك جەلىسىندە رۋحيانىڭ تالانتىنا ءوز ريزاشىلىعىن ءبىلدىرىپ جاتىر. ءتىپتى كەيبىرى ونى كەلەسى كەزەڭگە لايىق دەپ باعالاپ، جاس ءانشىنىڭ بولاشاعىنا ساتتىلىك تىلەدى.

ەسكە سالا كەتسەك، 2017-جىلى ديماش قۇدايبەرگەن قىتايدىڭ حۋنان تەلەارناسىنىڭ «Singer 2017» ءان بايقاۋىنا قاتىسىپ، ەكىنشى ورىندى جەڭىپ الدى جانە الەمدىك ارەنادا تانىمال انشىگە اينالدى.

وسىعان دەيىن ديماش قاتىسقان «Singer» بايقاۋىندا رۋحيا بايدۇكەن باق سىنايتىنىن جازعان ەدىك.