قازاقستاندىق اسكەري قىزمەتشى ا ق ش-تا رەكورد ورناتتى
استانا. KAZINFORM - قازاقستان قارۋلى كۇشتەرىنىڭ كومانداسى اريزونا شتاتىنداعى كەمپ ناۆاحو اسكەري بازاسىندا جىل سايىن وتەتىن Best worrier بايقاۋىنا قاتىسىپ جاتىر. بۇل تۋرالى قورعانىس مينيسترلىگى حابارلايدى.
قازاقستاننىڭ نامىسىن وتكەن جىلى كاسىبي سايىستا جۇلدەلى ورىندارعا يە بولعان 54835-ا اسكەري ءبولىمى باتالونىنىڭ سەرجانتى 3-سىنىپتى سەرجانت اسلان دارحان مەن 18404 اسكەري ءبولىمى روتاسىنىڭ 3-سىنىپتى گۆارديا سەرجانتى راۋان توقتاربەكوۆ قورعاپ جاتىر.
18-مامىرعا دەيىن سوزىلاتىن بايقاۋعا ا ق ش- تىڭ 7 شتاتىنان، فيدجي، گۋام، تونگا جانە فيليپپيننەن كەلگەن اسكەري قىزمەتشىلەر سايىسادى. اريزونا ۇلتتىق گۆاردياسى جىل سايىن Best worrier بايقاۋىن وتكىزىپ، وندا اسكەري قولدانبالى پاندەردەن ۇزدىك دەپ تانىلعان سەرجانتتاردى انىقتايدى.
جارىس ارميالىق جاۋىنگەرلىك فيتنەس تەستى، جاۋىنگەرلىك دايارلىقتى وقىتۋ پاندەرىنەن نورماتيۆتەردى ورىنداۋ، تۇنگى كۇزەت، كارتامەن جۇمىس، ايماقتى باعالاۋ جانە ازيمۋت بويىنشا قوزعالىس، جەرگىلىكتى جەردى پاترۋلدەۋ، تاكتيكالىق مەديتسينا، M-240B پۋلەمەتىنەن، M-4 اۆتوماتىنان، M-17 تاپانشاسىنان اتۋ، ارنايى اسكەري ساۋىتپەن جانە 12 كەلى جۇكپەن 22 شاقىرىمعا مارش جۇگىرۋ سىندى 10 نەگىزگى جارىستان تۇرادى.
ءدۇبىرلى دودادا ا ق ش ارمياسىنىڭ قارۋ-جاراعىمەن جانە قۇرالدارىندا جاتتىعۋلار مەن نورماتيۆتەردى ورىنداسا دا ءبىزدىڭ اسكەري قىزمەتشىلەر تاماشا ناتيجەلەر كورسەتىپ جاتىر.
ناقتىراق ايتساق، 3-سىنىپتى سەرجانت دارحان اسلان 800 مەترگە جۇگىرۋدە قاشىقتىقتى 2 مينۋت 5 سەكۋندتا ەڭسەرىپ، ۇزدىك ناتيجە كورسەتتى. ول كورسەتكەن ناتيجە اريزونا شتاتىنىڭ ۇلتتىق گۆارديا بايقاۋى تاريحىنداعى رەكورد رەتىندە تىركەلدى.
ايتا كەتەيىك، مامىردا پرەزيدەنت اسكەري قىزمەتشىلەرگە مەملەكەتتىك ناگرادالار تاپسىردى.
