قازاقستاندىق پارادزيۋدوشى ەرعالي شامەي التىنعا تالاسادى
پاريج. KAZINFORM - قازاقستاندىق پارادزيۋدوشى ەرعالي شامەي پاريجدە ءوتىپ جاتقان پاراليمپيادا ويىندارىنىڭ فينالىنا شىقتى.
پارادزيۋدودان الەم جانە ازيا ويىندارىنىڭ چەمپيونى ەرعالي شامەي J1 ساناتى بويىنشا 73 كەلىگە دەيىنگى سالماقتا جارتىلاي فينالدىق كەزدەسۋدە گەرمانيا سپورتشىسى لەنارت ساسستى 10:1 ەسەبىمەن جەڭدى.
قازاقستاندىق بالۋان باستاپقى بەلدەسۋىندە ەۋروپا چەمپيوناتىنىڭ كۇمىس جۇلدەگەرى، فرانسيالىق ارميندو رودريگەستى تازا ۇتتى - 10:0.
تاعى ءبىر قازاقستاندىق دايانا فەدوسوۆا J2 ساناتىندا 57 كەلىگە دەيىنگى سالماقتا سەنساتسيا جاساپ، پاراليمپيادانىڭ ەكى دۇركىن كۇمىس جۇلدەگەرى، الەم چەمپيوناتىندا كۇمىس العان برازيليالىق ليۋسيا تەيشەيرا اراۋجو دا سيلۆانى قاپى قالدىردى - 10:0.
دەگەنمەن ول جارتىلاي فينالدا ريو پاراليمپياداسىنىڭ قولا جۇلدەگەرى، جاپونيالىق دزيۋنكو حيروسەگە ەسە جىبەردى. ءسويتىپ دايانا قولا جۇلدە ءۇشىن تۇركيالىق دوندۋ ەسيليۋرتپەن كۇرەسەدى.
فينالدىق بەلدەسۋلەر استانا ۋاقىتىمەن ساعات 19.00 گە جوسپارلانعان.
ەسكە سالا كەتەيىك، بۇدان بۇرىن اقمارال ناۋاتبەكتىڭ جازعى پاراليمپيادا ويىندارىنىڭ جەڭىمپازى اتانعانىن جازعان بولاتىنبىز.
سونداي-اق قازاقستاندىق ءجۇزۋ شەبەرى نۇرداۋلەت جۇماعالي پاراليمپيادانىڭ كۇمىس جۇلدەگەرى بولدى.
