قازاقستانداعى ەڭ ۇزىن كوپىر سىناقتان ءوتتى

استانا. KAZINFORM - شىعىس قازاقستان وبلىسىنداعى بۇقتىرما سۋ قويماسى ارقىلى وتەتىن ۇزىندىعى 1316 مەتر ەكى جولاقتى كوپىر ارنايى سىناقتان ءوتتى. بۇل تۋرالى كولىك مينيسترلىگىنىڭ باسپا ءسوز قىزمەتى ءمالىم ەتتى.

بۇل - قازاقستانداعى ەڭ ۇزىن كوپىر.

كوپىر قۇرىلىسىن تەكسەرۋ ءۇشىن جالپى جۇكتەمەسى 450 توننانى قۇرايتىن 15 جۇك كولىگى تارتىلدى. ارنايى قۇرىلعىلار كوپىردەگى دەفورماتسيا، ءدىرىل (ۆيبراتسيا) جانە جۇكتەمەنى ءبولۋ كورسەتكىشتەرىن تىركەپ الدى، - دەلىنگەن كولىك مينيسترلىگىنىڭ باسپا ءسوز قىزمەتى تاراتقان اقپاراتتا.

سىناق ناتيجەلەرى بۇقتىرما سۋ قويماسى ارقىلى وتەتىن جاڭا كوپىردىڭ بارلىق نورماتيۆتىك قاۋىپسىزدىك تالاپتارىنا سايكەس كەلەتىنىن جانە ۇلكەن جۇكتەمەلەرگە توتەپ بەرە الاتىنىن راستادى.

ەكى جولاقتى كوپىر شىعىس قازاقستان وبلىسىنىڭ جارما، كاتونقاراعاي، كۇرشىم، كوكپەكتى، زايسان جانە التاي اۋداندارى اراسىندا كولىكتەردىڭ جىل بويى ۇزدىكسىز ءجۇرۋى ءۇشىن قاجەت.

ايتا كەتەيىك، ۇكىمەت باسشىسى ولجاس بەكتەنوۆ شىلدە ايىندا شىعىس قازاقستان وبلىسىنا جۇمىس ساپارى بارىسىندا جول-كولىك سالاسىن دامىتۋ جوسپارلارىمەن تانىسىپ، بۇقتىرما سۋ قويماسىنداعى كۇرشىم كوپىر وتكەلىنىڭ قۇرىلىس قارقىنىن تەكسەردى.

سونىمەن قاتار، شىعىس قازاقستان وبلىسىندا سالىنىپ جاتقان كوپىر اقىلى بولۋى مۇمكىن ەكەنى ايتىلدى.

 

اۆتور
تالعاتجان مۇحامەتبەك ۇلى