قازاقستانداعى جول اپاتتارىنىڭ نەگىزگى سەبەپتەرىنىڭ ءبىرى اتالدى
استانا. KAZINFORM - ەنەرگەتيكالىق سۋسىندار قازاقستانداعى جول اپاتتارىنىڭ نەگىزگى سەبەپتەرىنىڭ ءبىرى سانالىپ وتىر. تەراپيەۆت ءنادىر نارزۋللانىڭ ايتۋىنشا، ۇيقىسى قانباعان جۇرگىزۋشىلەر ەنەرگەتيكالىق سۋسىن ءىشىپ، سەرگەك بولۋعا تىرىسادى.
دارىگەرلەر قالاارالىق باعىتتاردا كوپ جۇرەتىن جۇرگىزۋشىلەر اراسىنداعى جول-كولىك وقيعالارىنىڭ كوبەيۋىنە ەنەرگەتيكالىق سۋسىندار دا اسەر ەتىپ وتىرعانىن ەرەكشە اتاپ ءوتتى.
- كوبىسى نازار اۋدارمايدى، ءبىراق ەنەرگەتيكالىق سۋسىندار شىعاراتىن كومپانيالار سۋسىننىڭ «جۇيكە جۇيەسى قوزعان ادامدارعا» قارسى كورسەتكىشى بار ەكەنىن ەسكەرتەدى. جۇيكە جۇيەسى قوزعان ادامدارعا كىمدى جاتقىزامىز؟ بۇل نيەۆرولوگياعا سايكەس ۇيقىسى قانبايتىن ادامدار. ءبىزدىڭ ەلىمىزدە ۇيقىسى قانباعان تاكسي جۇرگىزۋشىلەرى ەنەرگەتيكالىق سۋسىن ءىشىپ، جولعا شىعا بەرەتىنىن جاقسى بىلەمىز. سۋسىننىڭ قۇرامىنداعى L- كارنيتين مەن كوفەين جۇيكە جۇيەسىنىڭ جۇمىسىن السىرەتەدى. جۇرگىزۋشى سەرگەك، سويلەسە الادى، ءبىراق ءوزىن-ءوزى باسقارا المايتىن كۇيدە بولادى. ادام مۇنى سەزبەۋى مۇمكىن، ءىس جۇزىندە ول ءوزىن باسقارا المايدى، - دەپ اتاپ ءوتتى مامان.
سونداي-اق اپاتتاردىڭ ءجيى بولۋىنا كوپتەگەن فاكتور، سونىڭ ىشىندە توزىعى جەتكەن كولىكتەر، ناشار ينفراقۇرىلىم جانە جۇرگىزۋشىلەردىڭ ەنەرگەتيكالىق سۋسىنداردى پايدالانۋى سەبەپ بولادى. ينفراقۇرىلىمدى مودەرنيزاتسيالاۋ جانە ەرەجەلەردى قاتايتۋ شارالارىنا قاراماستان، ماماندار جول قوزعالىسى قاۋىپسىزدىگى ءۇشىن جۇرگىزۋشىلەر جەكە جاۋاپكەرشىلىگىن تۇسىنبەيىنشە، ايتارلىقتاي وزگەرىستەر بولمايتىنىن ايتادى.
