قازاقستانداعى العاشقى مۇناي وڭدەۋ زاۋىتى قالاي قۇرىلدى
استانا. KAZINFORM - قازاقستانداعى العاشقى مۇناي وڭدەۋ زاۋىتىنىڭ ىرگەتاسى 1943-جىلى اتىراۋدا قالانعان.
1943-جىلى ساۋىردە كسرو مەملەكەتتىك قورعانىس كوميتەتى كەڭەس وداعىنىڭ شىعىس ايماقتارىندا مۇناي وڭدەۋ زاۋىتىن سالۋ تۋرالى قۇپيا قاۋلى شىعاردى.
كاسىپورىننىڭ ورنالاساتىن جەرى گۋريەۆ (قازىرگى اتىراۋ) قالاسى بولىپ بەكىتىلدى.
زاۋىت قۇرىلىسىنا امەريكاندىق ينجەنەرلەر بەلسەندى اتسالىسىپ، تەحنيكالىق جوباسىن دايىنداپ، «لەند- ليز» شارتى بويىنشا جابدىقتاردىڭ ءبىر بولىگىن جەتكىزدى.
جوبانى جەرگىلىكتى ەرەكشەلىكتەردى ەسكەرە وتىرىپ، كەيىننەن زاۋىتتىڭ العاشقى باسشىسى بولعان گاۆرييل گورەچەنكوۆ باستاعان كەڭەستىك ينجەنەرلەر جۇزەگە اسىردى.
قازاقتان شىققان تۇڭعىش مۇناي ينجەنەرى، داڭقتى مۇنايشى سافي وتەبايەۆ تەحنيكالىق قۇجاتتى ازىرلەۋگە بەلسەنە قاتىستى.
زاۋىت قۇرىلىسى 1943-جىلى قازاندا باستالدى. قۋاتى جىلىنا 800 مىڭ توننا مۇناي وڭدەيتىن كاسىپورىن سوعىستان كەيىن ىسكە قوسىلدى.
1945-جىلى 8-قىركۇيەكتە №441 م ءو ز- العاشقى ءونىمىن - اۆتوموبيل بەنزينىن شىعاردى.
وسىلايشا قازاقستاننىڭ مۇناي وڭدەۋ سالاسىنىڭ نەگىزى قالاندى.
