قازاقستاندا زەينەتاقى جيناعىن ەرتە شەشىپ الۋ توقتاتىلۋى مۇمكىن

استانا. KAZINFORM - ەلىمىزدە كەيبىر ساراپشىلار زەينەتاقى قورىنداعى جيناقتى ەرتە شەشىپ الۋدى توقتاتۋدى ۇسىندى. وسىعان وراي ەڭبەك جانە حالىقتى الەۋمەتتىك قولداۋ ءمينيسترى سۆەتلانا جاقىپوۆا پىكىر ءبىلدىردى.

«بازالىق زەينەتاقى تولەمىن باسقاشا ەسەپتەۋ تاسىلىمەن كەلىسەمىز. ءبىزدىڭ ۇسىنىس، زەينەتاقى ەڭ تومەنگى ەڭبەكاقىنىڭ %60 قۇراۋى كەرەك. ەكىنشى، ول ساراپشىلاردىڭ ۇسىنىسى، ياعني زەينەتاقى قورىنان جيناقتى ەرتە شەشىپ الۋدى توقتاتۋ، ءبىز بۇنىمەن دە كەلىسەمىز. قازىر كورىپ وتىرعانىمىزداي، ەرتە شەشىپ العانداردىڭ زەينەتاقىسى 34 مىڭ تەڭگەدەن اسپايدى، سوندىقتان ونى دوعارۋ كەرەك»، - دەدى سۆەتلانا جاقىپوۆا ۇكىمەت ءۇيى قابىرعاسىندا ب ا ق وكىلدەرىنىڭ ساۋالىنا جاۋاپ بەرە تۇرىپ.

ءمينيستردىڭ مالىمدەۋىنشە، 3 تريلليون تەڭگەدەن استام قاراجات زەينەتاقى قورىنان ەرتە شەشىلىپ الىنعان.

«بىلاي قاراساق، 1,5 ميلليون ادام زەينەتاقى تولەمدەرىمەن قامتىلدى، 3 تريلليون تەڭگەدەن استام قارجى زەينەتاقى قورىنان شىعارىلدى. ول قارجىعا ادامدار ءۇي جاعدايلارىن جاقسارتتى، دەنساۋلىعىن ەمدەدى. سوندىقتان بەكەر جۇمسالدى دەۋگە بولمايدى» - دەيدى ول.

ايتا كەتسەك، بۇگىندە ەلىمىزدەگى ورتاشا زەينەتاقى - 132 مىڭ تەڭگە.