قازاقستاندا وسى اپتادا 42 گرادۋس اياز بولادى
«قازگيدرومەت» ر م ك سينوپتيكتەرى قازاقستان اۋماعىندا 7-9-جەلتوقسان كۇندەرى بولاتىن اۋا رايى بولجامىن جاريالادى، دەپ حابارلايدى Kazinform اگەنتتىگى.
سۋىق سولتۇستىك-باتىس انتيسيكلونىنىڭ باسىپ كىرۋىمەن رەسپۋبليكانىڭ باسىم بولىگىندە جاۋىن-شاشىننىڭ توقتاپ، اۋا تەمپەراتۋراسىنىڭ كۇرت تومەندەۋى بولجانىپ وتىر. قازاقستاننىڭ شىعىس جانە وڭتۇستىك وبلىستارىندا عانا جاۋىن-شاشىن (جاڭبىر، قار) ساقتالادى.
«تۇنگى ساعاتتاردا اۋانىڭ تەمپەراتۋراسى باتىستا 10-20- گرادۋسقا دەيىن، سولتۇستىك- باتىس جانە سولتۇستىكتە 28-38- گرادۋسقا دەيىن، رەسپۋبليكانىڭ قيىر سولتۇستىگىندە 42- گرادۋسقا دەيىن، ورتالىقتا جانە شىعىستا - 28-33- گرادۋسقا دەيىن تومەندەيدى، ال وڭتۇستىكتە -5-13 گرادۋس سۋىق بولادى. رەسپۋبليكا بويىنشا تۇمان ءتۇسىپ، ەلدىڭ وڭتۇستىگىندە جەل كۇشەيەدى»، دەلىنگەن حابارلامادا.
